Aizawl tui lâkna a la chhia

Tun hnaia Tlawng lui lian vanga Greater Aizawl Water Suppy Scheme (GAWSS) Phase-II khawl ṭha lo chu nimin tlai thleng khan siam ṭhat a la ni lo a, hei vang hian Phase-II hmangin tui pump theih a la ni lo.

PHE department hotute hnen aṭanga thu dawn danin, ruahsûr leh tuilian nasa vangin GAWSS Phase-II khawl pakhat (intake), tui chhunga awm chu chirhin a khuh a, chu vang chuan khawl a che thei lo. Khawl chu a vir zeuh theih chuan chirh lak aṭangin a tâl chhuah theih beisei a ni a, tiche turin hmanrua hman a ngaih bakah, Sairanga tuithiamte khawih chêttir tum a ni.

GAWSS Phase-II hi a intake bakah, control panel eng emaw zat a chhia a, chu'ngte chu a siam hna thawh mek a ni.

GAWSS Phase-I intake erawh chu hman theih a ni a, Phase-II intake-ah vuahin, June 15 khan hun eng emaw chen tui pump ni mah se, chirha a tàn leh avangin tui pump chhunzawm theih a ni lo.

Tunah hian lei hîpna (gravity) hmangin Serlui tui Dihmunzawlah lak a ni a, chu chu Phase-I hmangin Tuikhuahtlangah lak chhoh a ni.

Dihmunzawlah hian tui a tam lo a, ni thum chhung ruah a sûr loh phei chuan gravity hmangin Serlui tui lak theih a ni dawn lo. Hei bakah hian, Phase-I hian mipui mamawh hmun thuma ṭhena hmun khat pawh a phuhru zo lo a ni.