MNF-in martar 12-te ruhro an thlah ; Politics khelh nan martarte kan mamawh - Zorama

MNF party chuan, MNF rammu zinga India sipaiin an kah hlum zinga mi 12-te ruhro, tun hnaia an thlan aṭanga an phawrh chu nimin khan Martar Thlanmualah thlahna inkhawm an hmang. MNF president Zo­ramthanga chuan, ram tana martarte thihna chu politics-ah an mamawh avangin an hmang zel dawn tih a sawi.

Hnam tana martarte chu mi ṭhenkhatin politics khelh nana hmangah MNF an puh tih sawiin Zoramthanga chuan, "Hnam martarte thihna hi politics-ah kan mamawh a, kan hmang tawh a, kan hmang mek a, kan la hmang zel dawn a ni," a ti.

MNF President chuan, ram tana martarte ruhro chuan thu a la sawi zel dawn tih sawiin, "Ram leh hnam tana martarte kha Zoram ṭhalai, nu leh pate'n kan ngaisang tulh tulh a, an hlutna kan la têl zel dawn," a ti a; ram leh hnam humhalh nan an martar avangin YMA thuvawn nen pawh hnam martarte thihna chu a inang chiah niin a sawi.

Zoramthanga chuan, Martar Thlanmual chu Mizote phuarkhawmtu leh zahawma siamtu nia sawiin, "Tunah hian Martar Thlanmuala la zalh loh ruang eng emaw zat a la awm," a ti a; martarte ruhro la lak khawm lohte chu a remchan dan anga Martar Thlanmuala lak vek an tum thu a sawi.

Ruhro thlahna in­khawm hi MNF treasurer Vanlalzawma'n a kaihruai a; Ex-MNA vice president C Zama'n an chanchin tawi sawiin, martar chhung­te pawhin thu an sawi.

Martarte ruhro an thlahte chu
# Hming Khua Thih Ni
1. Capt. Rumliana Tualte 8.5.1967
2. Lt. Thanseia Sawleng 11.7.1968
3. 2/Lt. Lalrinliana Ngopa 11.7.1968
4. Sgt.Lalrinthanga, 'Z' Bn Maubawk 31.10.1968
5. Cpl.Lalnunmawia, 'Z' Bn Khatla 31.10.1968
6. L/Cpl. Lalhmuakliana, 'V' Bn Zemabawk 8.5.1967
7. L/Cpl. Lalnghilhlova, 'V' Bn Lungmuat 8.5.1967
8. Pte. Tawnluaia, 'V' Bn Mualvum 8.3.1969
9. Lalhmingliana, MNV Kawlkulh 11.7.1968
10. Romawia Zanlawn 11.7.1968
11. Kapzawna, MNV Pualreng 12.3.1968
12. Seikholet Kuki, MNV Sialsi, Manipur