Lei khi vanga mahni in luah ngam lo Chhungkaw eng emaw zat an awm
Tunlaia ruah sûr ṭhin vangin Aizawl veng ṭhenkhatah chhungkua eng emaw zat mahni in luah ngam lo leh luah thei lo an awm mek.
June 13 zinga lei min vanga in chimna Saron Venga Branch YMA hruaitu S Rochama hnen aṭanga thu dawn danin, Saron Vengah hian zau taka lei a khîk vangin chhungkaw 140 vel-in bungrua an thiar chhuak a, chu'ng zinga chhungkaw pathum chu an inah an riak lut leh tawh a, chhungkaw dang zawng erawh chu an la lut leh lo.
Saron Venga lei min leh lei khi hi Tuithiang Veng nena an inrina bulah a ni a, Tuithiangah pawh chhungkaw 26 an inthiar chhuak nia thu dawn a ni. Hetih lai hian, nimin thleng kha chuan lei a khîk belh lo tih an sawi.
Saron Venga lei minin
Chhinga Veng - Bethlehem Veng kawngpui a hnawh chu nimin thleng khan lirthei kal theiha tnenfai a la ni lo tih S Rochama chuan a sawi.
Venghluiah chuan kum 2015-a lei khikna ṭhin, Puithiam lui hnár lamah June 13, 2017 aṭang khan lei a khi thar leh a, hei vang hian chhungkaw pali an riak chhuak ṭhin.
Venghluia lei khîkna huam chhunga chengte'n Vanglaini palai an hrilh danin, tun hnaia an awmna vel khi leh hian in 10 vel a huam a, chhungkaw 20 chuang an ni. Lei khîk vang hian chhungkaw pahnihin bungrua an thiar chhuak a, chhungkaw pali an riak chhuak ṭhin a ni.
Zawhna chhangin lei khîkna huam chhunga awmte chuan, kumin June 13-a lei a khik belh leh hnuah nimin chawhnu lam thleng khan sorkar thuneitute lam aṭanga enfiahtu an la awm loh thu an sawi.
Vaivakawnah pawh Section 1, 2 leh 4 huam chhungah lei a khîk avangin chhungkaw 12 an inthiar chhuak tawh a, lei khi hian chhung-kaw 24 vel chenna a huam. Lei khîkna hmun hi tun hma pawha a lo chêt tawhna ṭhin a ni a ni.
Thu dawn danin, Vaivakawn aṭanga Luangmual Chhangurkâwn panna kawng chhuat pawh a tlak-hniam bakah, kawngpui a khi a nasa a; kawngpui bula awm chhungkaw pathum chu an inthiar chhuak tawh a ni. Vaivakawn lei khi hi June 15, Ningani khan Aizawl mayor PC Lalhming-thanga, AMC councillor-te leh Geology & Mineral Resources department-a mi thiamten an enfiah.
Tuikual North leh Dinthar inkarah pawh lei min vangin chhungkaw paruk an riak chhuak a; lei min kawng a hnawh chu thenfai hna thawh mek a ni a, mahse, nimin thleng khan kawng an la tlang lo niin an sawi.