Mi 80-te eizawnna bul ṭanna tur pe

CARE World Vision India chuan, nimin khan Chanmari YMA Hall-ah Economic Development Assistance (EDA) chungchang zirhona leh bungraw semna hun an hmang a; chhungkaw 80 hnenah eizawnna bul ṭan-na tur bungrua an hlan.

CARE World Vision India hi kum 1996-ah Aizawlah an awm ṭan a, EDA hi kum 2004 aṭang-in an kalpui. EDA hnuai-ah kum tin chhungkaw eng emaw zat hnenah eizawnna bul ṭanna tur hmanrua an sem ṭhin a, tun thlengin chhungkaw 800 vel an pui tawh a ni.

Kumin hian mi pakhat tan bungrua Rs. 20,000 hû zel an pe a; nimin khan mi 80 hnenah an pe a, May thla khan mi 43 hnenah an pe tawh a, kumina an pek tawh zat chu mi 123 an ni.

Ṭanpuina an pekte hi World Vision hnuaia Child Sponsorship Programme-a naupang an enkawl mekte chhungkua aṭanga mamawh zuala an hriatte an ni a; kumina an pekte hi beauty culture leh petty trade khawih turte an ni.

Kum dangah chuan ar vulh, vawk vulh, bawng vulh leh thil dang-ahte pawh ṭanpuina an pe ṭhin.