Khawthlangtuipui-in in tam tak a la chîm

Khawthlangtuipui lian chuan ziaawm lam a pan zel laiin, Tlabung leh a chhehvela in eng emaw zat a la chîm.

Tui lian vanga harsatna tâwkte hnenah Border Security Force leh Health department chuan damdawi an sem.

Tlabung Post editor Vanlalhriatpuia Khiangte hnen aṭanga thu dawn danin, Khawthlangtuipui lianin harsatna a thlen dan chu 159 BSF commandant LS Dahiya hoin BSF sipaite leh Tlabunga Health department-te'n khaw hrang hrangah endikin, mipuite hriselna dinhmun an enfiah.

BSF-a medical officer Dr Lalrinchhana Pachuau leh Tlabung damdawi-ina medical officer Dr Lalrengpuii Ralte-te chuan tui lian tuarte hriselna dinhmun an enfiah a, damlo ṭhenkhat hnenah a thlâwnin damdawi an sem nghal a ni.

Khawthlangtuipui lian hian ramri hrûl hmun ṭhenkhata sipaite awmna, border outpost pawh a chîm a; BSF commandant LS Dahiya chuan, khuarel chhiatna tâwkte ṭanpui kawngah theihtawp chhuah turin sipaite a sáwm a, "Khuarel chhiatna a thlenin mahni sahimna aiin vantlang mipui, nunaute sahimna kan ngaih pawimawh hmasak a ṭul," a ti a; BSF chu ram venghimtu ni mah se, vanduaina tâwk mi dangte chhawmdawl kawngah ramri thliar lo turin a chah.

Tun ṭuma Khawthlangtuipui lian hi kum 1997 hnua a len ber ṭum a ni a, lui tui hian a luan pangngai aia metre 18 vela sang a chîm thleng. Tlabung Sub-Division huam chhunga kawng hrang hranga tuilian tuar zât chu chhungkaw 1,500 chuang an ni a, chênna in 650 vel a chîm.

Tlabung bikah an chhinchhiah danin, a chîm san lai berin in 228 a chim a, nimin thleng khan in 80 vel a la chîm. Tlabungah hian tuiin in pakua a lên bo a, luah zui tlak loh in dang 13 a awm. Tui lian tuarte chu community hall, sikul, MSU office, bazar building, hari mandir, sorkar in remchangahte leh mimal inahte an insuan lut a; YMA-te June 13 aṭang khan ni tin an la hnatlang a ni.

Tlabung Sub-Division huam chhunga tuilian tuar nasa bera ngaih chu Tippereghat leh Serhuan khuate an ni a, heng khaw pahnih hi tuiin a chîm pil deuh vek a; mipuite chuan an awm lailâwkna atan hmun sáng lai leh mual pâwng remchangah hulhliap an zár a ni.

Tuilian hian tuikhur leh tuizémte a chîm pil nasa tih sawiin Tlabung Post editor chuan, "Tui in tur thianghlim a váng a, hei hi mi tam tak harsatna ber pakhat a ni," a ti. Electric ban leh hrui chhia a awm nual tih a sawi bawk.