KHAWTHLIR

GST meeting-ah Taxation Minister
Goods & Services Tax (GST) Council Meeting chu Pathianni hian New Delhi-ah neih a ni dawn a, meeting-a tel tur hian Taxation minister Lalsawta chuan vawiin hian Aizawl a chhuahsan ang a, June 20-ah a lo kîr leh ang. GST hi India ram pumah July 1, 2017 aṭanga hman ṭan tura tih a ni a, Mizoram sorkar pawh hun tiama hman ṭan ngei tumin a inbuatsaih mek.

MJS result
Mizoram Public Service Commission chuan nimin khan Mizoram Judicial Service (MJS) Grade-III, Civil Judge Cadre preliminary examination result a tichhuak a; exam hmachhawn zawng zawng mi 225 aṭangin main examination hmachhawn turin mi 167 an tling. MJS-ah hian mi 16 lak tum a ni.

BLO training
Thenzawl Sub-Division chhunga inthlan buaipuitu booth level officer (BLO)-te pualin nimin khan Thenzawl Civil SDO pisaah training buatsaih a ni a, electoral roll officer (ERO) Melody Ngurthantluangi'n Election Commission of India-in Special Drive a kalpui tura BLO-te hriat tur leh tih turte a sawifiah.

Tree planting camp
Thenzawla Environment, Forest & Climate Change (EFCC) department leh AH&Vety department chuan nimin khan AH&Vety Farm Complex, Thenzawlah Tree Planting Camp an buatsaih a; AH&Vety director Dr Saingura Sailo-in a hmanpui. Camp-ah hian Vety Farm Complex chhungah thing ṭiak 150 an phun a ni.

Fimkhur turin ti
Lunglei SDO (Sadar) chuan nimin khan hriattirna a chhuah a; Regional Meteorological Center, Guwahati aṭanga thu an dawn angin, vawiin June 17 hian ruah a sûr nasa tura rin a nih avangin mipuite fimkhur turin a hriattir.