Tun hnaia chhiatna thlengah Mi 11 an thi, in 547 a chhia

Tun hnaia ruahsûr nasa vanga lei min leh tui lian chu Aizawl leh Lunglei district-in an tuar nasa ber. District pahnihah hian chhiatna thleng vangin mi 11 an thi a, in chhe vek 183 leh in ṭhenkhat lai chhia 364 a awm. In chhia zawng zawng hi 547 a ni.

Sorkar chhinchhiah danin, kumin June 9-13 chhunga ruahsur nasa vanga chhiatna thleng vangin Aizawl district-ah nunna chán mi pakhat a awm a, hliam mi pahnih an awm. Lunglei district-ah chuan June 11-13 chhungin lei tawlh leh tui lian vangin mi 10 an thi a, mi pali an hliam.

Lunglei district-ah hian Phairuangkaiah mi pali an thi a, mitthite ruang chu zawn hmuh vek tawh a ni. Marpara-ah tui lian leh lei min vangin mi pathum an thi a, mitthi zinga pahnihte ruang hmuh a nih tawh laiin, pakhat hmuh a la ni lo a, zawn mek zel a ni.

June 12 zana tuihâwkin Chhuanmawia te in a hnâwlna Changpui khuaa mi pahnih thi zinga nu ber Lalhunmawii (32) ruang chu hmuh ni tawhin, phûm a ni tawh a; an fapa Vanlalpeka (3) ruang pawh ni ruk chhung zawn a nih hnuah nimin chhun dar 1:30 vel khan hmuh a ni. Vanlalpeka ruang zawnnaah hian Changpui khaw mite bakah, Lungchem, Thenhlum, Bungtlang, Buarpui, Bunghmun leh khaw danga mi tlawmngaite an thawk chhuak a ni.

Tui lian leh lei min vanga in chhe vek Aizawl district-ah 18 leh Lunglei district-ah 165 a awm a, in chhe vek hi a vaiin 183 a ni. In ṭhenkhat lai chhia Aizawl district-ah 65 leh Lunglei district-ah 299 a awm a, a vaiin in 364 a ni.

Lawngtlai district-ah chuan Ngengpuikai leh Khawmawi khuaah tui lianin chenna in paruk ve ve a chîm a, hei bakah hian Khawmawiah mi 68-te nûl leh Ngengpui kaiah chhungkaw 70 chuang eizawnna nûl a tichhe vek bawk.

Tui lian tawrh nasatna ber Tlabung leh a chhehvel khuaahte chuan Khawthlangtuipui kám tial tial mah se, nunphung a la pangngai thei lo a; hmun him lama inthiar chhuak chhungkaw tam zawk chu an inah an la lêt leh lo a, zirna inte pawh la khâr rih a ni.

Tlabung aṭanga thu dawn danin, tui lianin a chim inte chu tuiin a kàmsan hnuah hnatlanga tihfai a ni a, in tam zawk chu tui lianin a tihchhiat avangin thawm ṭhat hmasak loh chuan luah tlâk a ni lo.

Tuiin in a chîm zinga (10%) vel chu sak ṭhat vek ngai tur khawpa chhia a ni a, 5% vel chu tui lianin a lên bo bawk.

Khawthlangtuipui hian nimin thleng khan hmun hniam lai deuha inte chu a la chîm a, Tlabung chhehvel khaw tam zawkah kawlphetha pêk chhuah theih a la ni lo.

Khawthlangtuipui lian vanga harsatna thlengah hian 159 battalion BSF-te chuan a theih ang angin chhawmdawlna hna an thawk a, tui in tur leh damdawi eng emaw zat an sem tawh a ni.

Tlawng lui lianin Sairang khua chhungkaw 52 chenna in a chim a, tui hian kam lam a pan tawh. Tunah hian chhungkaw pariat vel tih loh chuan an chenna in an luah leh tawh niin Sairang YMA hruaitute chuan an sawi. He tui lian hian lawngleng engemawzat a lenbo a, a tam zawk chu Hortoki khua-in an lo mansak.

Sairang hian ṭanpuina bialtu MLA K Sangṭhuama hnen aṭangin Rs. 10,000 bakah buhfai bag 15 leh silpauline fun thum, district disaster management aṭangin Rs. 2000, Tlangnuam BDO aṭangin Rs. 2000 leh Salvation Army Eastern Territory aṭangin buhfai bag 10, dal bag hnih leh tel case khat an dawng a ni.