Dampa Field Director thil tih dan YMA chona-ah Dampa YMA-in ngai

Dampa Group YMA chuan thuchhuah siamin, Mamit district chhung, Dampa Tiger Reserve-a field director V Lalfala chu dâwt hmanga mimal taka Dampa Group YMA Secre­tary beiah an puh a, a thil tih dan chu YMA a chonaah an ngaih thu an tarlang.

Dampa Group YMA chuan, Dampa Tiger Reserve chhunga thing zai rûk leh cubic lung tam tham tak an man chungchangah Field Director chu a mawh­phurtu ber nia a lan thu an sawi a, "Hetiang a nih laia V Lalfala'n mi dang kaltlanga kan secretary Lalrinfela Ralte dâwt hmanga mimal taka rawn bei a, defamation case file a tum hi YMA a chonaah kan ngai. YMA chu kan dinna ngaiah lung­rual takin kan ding tlat dawn a ni," an ti.

V Lalfala chu Mizorama sakei humhalhna awm­chhun, Dampa Tiger Re­serve tichereutu nia a lan thu sawiin Dampa YMA chuan, an huam chhungah kal tawh lo se an duh thu an tarlang bawk.

Dampa Group YMA hruai­tute hian June 5, 2017 khan Teirei Forest khuaa inter­pretation building an enfiah a, Ngiaupui ft. 12-a sei 4x4 (chârchâr)12, cubic thing­pek 30, 4x4 ft. 9-a sei 20 leh 4x3 tlawn15 vel an hmu a; hmun dangah ft. 12 leh ft. 8 vela sei, inchi 5 bial thingzai panga, 4x3 leh 4x4 tlawn 10 vel an hmu bawk.

Heng thingte hi Dampa Group YMA hruaitute chuan field director VLalfala hriatpuia zai a nih thu Vanglaini an lo hrilh tawh a ni.