Aizawla Cement leh iron rod zuar zinga 80 velin an hming hnam dang an hawhtir

Central YMA chuan Inrinni khan CYMA Hall-ah 'Iron Rod & Cement Dealers Meet' an buatsaih a, Aizawla iron rod leh cement zuar ṭhahnem tak an tel. He uhnah hian, Aizawla cement leh iron rod zuar zinga 80 velin an hming hnam dang an hawhtir tih sawi lan a ni.

CYMA hruaitute chuan, YMA Gene­ral Conference-in kumpuan atana a thlan, 'Ram leh hnam humhalh' kawnga hmalakna atan CYMA chuan Mizo hming hawha iron rod leh cement dawr hawngte leh bûkna dik lo hmang leh bûk tling loa hralh nasa lutuk tihbona kawngah hma an la ṭan dawn tih an sawi.

Hnam dang kawpa iron rod leh cement zuara sumdawngte chu an sumdawnna anmahni puala ti turin CYMA hruaitute chuan an sáwm a; dan loa sumdawng hnam dang dapchhuah beihpui thlak hunah Mizo leh Mizo inhmachhawn an duh loh thu kalkhawmte an hrilh.

Cement leh iron rod zuarte pawhin an harsatna tawh leh dik leh felfai zawka an kal zel theih nana hmalak an duhnate CYMA hruaitute hnenah hian an thlen a ni.

Central YMA Kumpuan Committee hruaitute leh Iron Rod & cement Zuar Association hruaitute chhinchhiah danin, tun dinhmunah Aizawlah iod rod leh cement zuar firm 112 vel an awm a; chu'ng zinga 80 vel chuan hnam dang kawpin, an hming hawhtirin hnam dang an sumdawntir a ni.