CM hoin badminton zirna hmun din dan tur sawiho

Mizorama rawn zin P Gopi­chand, National badminton chief coach leh chief minister Lal Than­hawla chu a chenna banglaah June 16, Zirtawpni khan an inkâwm a; Mizo­rama badminton zirna hmun­pui din chung­chang an sawi dun.

P Gopichand hi Ai­zawl DC Kannan Gopi­nathan leh Tata Trusts head of sports Anand Datla ten an ṭawiawm a, Chief Minis­ter nen hian badminton zirna hmun­pui din a nih theihna tura thil pawimawh ruahman lâwk ngai te, thawhhona thuthlung te, a hmun­hma te, sorkar leh Tata Trusts aṭanga thil tih theihte an sawi dun a ni.

Sorkar thuchhuah tarlan danin, badminton zirna hmunpui atan hian Sihphir ram en a ni tawh a, Sihphir Village Council pawhin hman an remti a ni.

Lal Thanhawla zawhna chhang­in Anand Datla chuan, Tata Trusts tirha Germany-a football zir mek Mizoram naupangte'n hma an sawn thu a sawi a, "Beiseina sang tak kan nei a ni," a ti.