Chhiatna thlenna hmun tlawh

Minister Zodintluanga, parliamentary secretary Hmingdailova Khiangte leh MLA Chalrosanga Ralte-te chuan Inrinni khan an bial chhunga tun hnaia tui lian leh lei minin thil a tih-chhiatte a hmunah an tlawh.

Minister Zodintluanga hian, tuihâwkin chenna in pakhat a hnâwlna hmun Changpui khua a tlawh a; harsatna an tawh dante enfiahin, a ṭul anga hmalak zel a nih tur thu a sawi.

Changpui khuaah hian in pathum chu luah tlak loha a chhiat vek bakah, an khaw khelmual a khîk avangin in ṭhenkhat ṭhiah a la ngai dawn nia thu dawn a ni.

Hmingdailova Khiangte pawhin Tlawng tui lianin Hortoki khuaa thil a tihchhiatte a enfiah a; V/C-te chu chhiat tâwkte hnenah an chhiat tawh dan kimchang la khawm turin a hrilh.

Tlawng tui lian vang hian Hortoki-a chhungkaw 420-te eizawnna nûl leh leileta an thil chìnte a chhe vek a, tuikhuah pawh 55 vel a chhia nia hriat a ni.

Lunglei West bialtu MLA Chalrosanga pawhin Lungleiah College Veng, Venglai leh Venghlun inkara chhiatna thlenna hmunte a tlawh. College Venga in siamṭhat hna thawh mekah ṭul leh mamawha hman atan YMA hnenah Rs. 18,000 a pe a, Venglai leh Venghlun inkara leimin thenfai hna thawk mek Venglai leh Venghlun Joint V/C-te hnenah Rs. 2,000 a pe bawk.