Goa-a hna thawh tumte fimkhur turin chah

Goa Mizo Welfare (GMW) chuan thuchhuah siamin, Goa-a hna thawk tura kal Mizo ṭhalaite zingah harsatna tawk an awm fo tih an tarlang a; Goa-a hna thawh tumte chu fimkhur turin an chah.

GMW tarlan danin, Goa-ah hna thawk turin Mizo ṭhalaite an kal fo a, tun hnaiah agency hrang hrangin hna thawhna tur an kawhhmuh aṭanga kal an tam zual. Chutih laiin, Goa-a hna thawk tura kal zingah harsatna tâwk an awm fo a ni.

Harsatna an tawh chhan langsar zual an tarlante chu - Mizorama hna an zawrh ang tak a lo nih leh ṭhin loh vang te, hna thawhnate'n Goa-ah awmna mumal an pek loh vang te, hlawh pek ṭhat loh vang te, company-te Mizorama an insawi ang an nih loh vang te, India hmarchhak mite an ngaihsak ṭhat loh bik vangte a ni.

GMW chuan, hna thawk tura Goa-a kal tumte chu an kal hmain uluk taka inngaihtuah hmasa tur leh hna an thawhna tur chu zir chiang hmasa turin an chah a; dan ang thlapa din a nih leh nih loh te, hlawh an pek ṭhat dan te, kum hmasa lama thawk tawhte ngaihdante hriat a ṭul thu an sawi.

Hna thawh dan tur zir chian hmasak a pawimawh thu sawiin GMW chuan, "Hna thawh dan tur te, thawktute tana himna turte ziakin an nei em tihte chian hmasak a ṭha. Goa-ah awmna tur min pe dawn em tih zawh chian hmasak ngei a ṭha a, awmna an pek theih loh chuan Goa-ah hian in luah man a to a, zawn hmuh mai a harsat mai bakah, khawsak a harsa ṭhin a ni," an ti.

Mizorama hna zawrhtute chincháng pawh zir chian a ṭul thu sawiin, "Employment agent-te hi a cháng chuan a lem pawh an lo ni thei. Agent-te chuan chiang takin an hrilhfiah thei tur a ni a, an sawi ang company a nih loh chuan agent-te'n mawh an phur ngam tur a ni a, ziak ngeia neih a ṭha ang," an ti a; agent-te'n mawh an phur ngam lo a nih chuan inbumna thil a ni thei tih an sawi.

GMW chu Goa sorkar hriatpuinaa ding an ni tih sawiin, Goa-a hna thawk tura lo kalte chu GMW hruaitute beráwn tur leh chincháng zawt chiang hmasa turin an ngen a ni.

Nu leh pate hnena ngenna siamin GMW chuan, "Kan fate/chhungte hna thawh leh hna thawhna kan hre chiang tur a ni," an ti a; nu leh pa tam takin an fate hna thawh hre chiang si loin pawisa thawn turin an ngen chiam ṭhin tih sawiin, chu chuan an fate rilru a piansualtir a, chhungte sum an thawn theihna a nih dawn phawt chuan tih hreh an neih loh phah ṭhin niin an sawi.

Goa-a hna thawk turin naupang lutuk, kum la tling lo pawh an kal fo tih sawiin, GMW chuan, "Tun hnaiah Goa-a hna thawk tura kalte zingah Mizo hmêl tibâl tak tak hmuh tur an awm ta nual mai a, hnam dangte'n Mizote bakah tláng mi zawng zawng min hmuhsit phahna turin kan fate awmtir lo ang u," an ti.

GMW chu Goa-a Mizo awmte tana ding a nih angin, nu leh pate chu an fate leh chhungte, Goa-a awmte chu GMW bêl tura fuih turin an ngen a, "Goa-a hna thawk tura lo kalte pawh GMW belh nacháng hre turin kan ngen a. GMW bèl duh lo leh hnaih duh lo an awm a, an chungah eng pawh thleng se GMW-in mawh kan phur dawn lo," an ti. Goa-a Mizo awmte chu Mizo inkhawmnaah inkhawm ṭhin turin an chah bawk.