BJP-in mi tin tana hmasawnna hun hmang

BJP, Mizoram Pradesh chuan nimin an pisaah sorkar laipuiin programme a duan, mi tin tana hmasawnna 'Sabka Saath-Sabka Vikas Samilan Program' an hmang a; Madhya Pradesh MP Riti Pathak leh Assam sorkara minister Chandra Mohan Patowary ten an hmanpui.

Riti Pathak chuan, a pasal chu Aizawl-ah Telcomunication lamah thawkin, a fate pahnih pawhin Aizawlah lehkha an zir thu a sawi a, "Mizoramah mikhualah ka inngai lo a, Mizo mipui kan ngaina a, hetiang dinhmuna kan lo din ve takah chuan India ram khawi hmunah pawh Mizote'n harsatna in tâwk a nih chuan min rawn be ṭhin ang che u," a ti.

India ram aṭanga retheihna ûmbo chu an party thil tum ber pakhat a nih thu sawiin Riti Pathak chuan, "Kum 2020 thlen hmain India ram mipui chenna nei lo zawng zawngte mahni puala chenna an neih vek theih nan Prime Minister kaihhruaina hnuaiah chak taka hmalak mek a ni," a ti a; Mizo mipuite'n BJP an thlawp chuan Mizoram chu state changkang tak a nih tur thu a sawi.

Chandra Mohan Patowary pawhin thu sawiin, "Mizoramah BJP sorkar hmalakna ṭha ti mi tam tak ka rawn hmu a, kum 2018-ah BJP-in Mizoramah sorkarna a siam ngei dawn niin a lang. Mizo mipuite'n Prime Minister hmalakna ṭha taka in lo thawhpui avang-in lawmthu ka sawi a ni," a ti.

Mizoramah sorkar laipui scheme ṭhenkhat a nihna ang ni loa kalpui a awma a hriat thu sawiin Chandra Mohan chuan, "BJP sorkar aṭang lo chuan hmasawnna hna thawh theih a nih loh avangin BJP hi Mizoram mipuite'n an thlawp a, sorkarna lo chantir ngei turin Mizo mipui ka sáwm a ni," a ti a; kum 2007-a Mizoram a rawn tlawh tum ṭum leh tun ṭuma a rawn zinah hmasawnna thar a hmuh loh thu a sawi.