KHAWTHLIR

Tanpuina hlan
St. Paul's High School-a lut ṭhin kum 1992 batch-te chuan tun hnaia lei min leh tui lian vanga harsatna tawk - Saron Veng, Tuithiang leh Hunthar Veng khawtlang hruaitute hnenah Inrinni khan Rs. 10,000 ṭheuh an hlan a; Sairang khawtlang hruaitute hnenah Rs. 10,000 an hlan leh ang.

Relief Sunday
Mizoram Baptist Kohhran chuan nimin khan Relief Sunday an hmang a, thupui chu 'Ṭanpui ngaite ṭanpui hi malsawmna dawnna hnâr a ni' tih a ni. Chawhmaah tualchhung kohhran tinah he ni pual hian hun hman a ni a, an hmunpui aṭanga Relief Sunday thuchah chhiar chhuah a ni.'

Thisen pe
Inrinni khan Aizawl Civil Hospital tan Model Veng Branch KṬP-in thisen unit 48 an pe a, Tuikual North Branch KṬP-te'n unit 22 an pe bawk. Serkawn Bial ṬKP-in Lunglei Civil Hospital tan Zohnuai East BCM kohhran hall-ah unit 34 an pe a; Mission Vengthlanga Jubili Branch KṬP-te'n Synod Hospital tan unit 19 an pe bawk.

In pali kâng
Kauchhuah khua, Lunglei district-ah Inrinni khan in pali a kâng a, thi leh hliam an awm lo. In kangte hi Mayaboron, Niloboron, Dinoboron, Morotso te in a ni a, Mayaboron-te in aṭanga chhuak ṭan a ni.

Rualbanlote Ni
Mizoram Presbyterian Kohhran chuan nimin khan Rualbanlote Ni an hmang a, thupui chu 'Lal Isua'n rualbanlote a ngaihsak' tih a ni. He ni pual hian Pathianni zan inkhawmah hun hman a ni a, thupui hmang hian kohhran hrang hrangah thuchah ngaihthlak a ni.

In thiahsak
Vaivakawn Zohnuaia chhungkaw pathum luah lai LH Lalṭhakima in chu a dinna lei a chêt avangin June 17, Inrinni khan khawtlangin hnatlangin an ṭhiat. LH Lalṭhakima in bul hnaia awm chhungkaw 10 luah inte pawh a luahtute'n an luah ngam lo a, an insuan chhuak tawh a ni.