SEDP ṭanpuina Rs 50,000 Sem hun tur hriat a la ni lo

Mizoram sorkar flagship programme, Socio Economic Development Programme (SEDP) hnuaia ṭanpuina sum, chhungkaw pakhat tana Rs 50,000 sem hun tur ram hruaitute'n sawi ṭhin mah se, tun dinhmunah chuan sem chhuah theih hun tur hi hriat a la ni lo.

Vanglaini palaiin CSS sum pek chhuahin SEDP sem hun turah nghawng a neih dawn leh dawn loh zawhna chhángin SEDP Executive Board vice chairman H Rammawi chuan, "SEDP ṭanpuina sem hun tur hi a hun tura tih a danglam deuh a nih pawhin, kan sem ngei ngei dawn. Sem hun tur tak sawi theih a la ni lo," a ti.

H Rammawi hian SEDP hnuaiah chhungkaw 32,756 hnenah bul ṭanna pek a nih tawh thu a lo sawi tawh a, "SEDP hnuaia pilot project-ah chhungkaw 32,756 hnenah bul ṭanna pek tawh a ni," a ti a; kumin chhungin chhungkaw 60,000 chuang hnenah Rs 50,000 zel pek hman tuma hmalak mek a nih thu a sawi.

SEDP Executive Board chairman Tawnluia, deputy chief minister chuan, February 8, 2022-a SEDP Executive Board ṭhutkhawm ṭumin sorkar kum thar (2022-23)-ah SEDP hmangin chhungkaw 60,000 vel tuam tum a nih thu a sawi a, "Hemi atan hian cheng vbc. 300 vel ruahman a ni dawn a, hei hi a thawh khatna tur a ni," a ti.

July 11, 2022-a SEDP Governing Board member-te an chairman Zoramthanga, chief minister hoa ṭhukhawm pawhin, SEDP hnuaia ṭanpuina sum chhungkuaa sem tur chu a thawh khatnaah constituency tina a dawngtu tura thlan zinga a zatve (50%) hnenah pek a, a bâk chu thawh hnihnaah pek turin an rél a ni.

SEDP Governing Board ṭhutkhawmah hian family oriented SEDP programme tlangzarhna state pum leh district tina buatsaih thuai an rél a; state pum huapa tlangzarh hnuah a tahtawlin district-ah hawnna hun hman ni se, an ti.