MLA hoin sikul din champha lawm

Thluak leh taksa lam khawih rualban lohna neite tana sikul din, Shining Star Special School, Republic Veng chuan nimin khan an sikul din champha vawi lina an hmang a, bialtu MLA C Lalsawivunga'n a hmanpui.

C Lalsawivunga chuan, harsatna nei naupangte'n zirna an dawn theihna tura ṭhahnemngaia sikul dintute chhuanawm a tih thu sawiin, "Ṭanrualna hnuaiah he sikul hi ṭha takin a kal chhoh zel ka ring tlat a ni," a ti a; zirlaite hruai leh thlahna atana an mamawh lirthei (van) ngaihtuah a nih tur thu a puang.

Zirlaite'n hma an sawn zel a beisei thu sawiin C Lalsawivunga chuan, "Sorkar lam hotu leh mi ṭhahnemngai kan neihte enkawl leh kaihhruainain sikul mamawh ngaihtuah kawngah kan vaia ṭanrual a pawimawh dawn a ni," a ti.

Persons with Disabilities commissioner Vanlaldiki Sailo pawhin thu sawiin, rualban lohna chu khawvelin a hre chiang telh telh tih a sawi a, "Anmahni koh dan leh enkawl dan pawh an fimkhurin an uluk tial tial a ni," tiin, Mizote pawhin rualbanlote chu vohbik tia an ziah tawh thu a sawi.

Shining Star Special School-ah hian zirlai 22 an awm a, principal hoin zirtirtu palite'n an enkawl a ni.