Pension rawih nawn duh loin MZP-in sorkar thupek an hâl

Mizo Zirlai Pawl (MZP), General Headquarters chuan Cooperation department-a pension tawh rawih nawnna thupek sût phûtin nimin khan Vanapa Hall kawtah pension rawih nawnna order an hâl.

Sorkar order hâlna inkhawm hi MZP vice presi­dent Andrew F Lalramnghaka'n a kaihruai a; thu sawitu MZP president Lalnunmawia Pautu chuan, "Mi bik leh thiam bikna nei lo, mimal induhsakna uchuak tak avanga sorkarin pension a ruai nawn hi ṭhalaite kawng dâltu a nih avang leh sorkar sum tam tak luan ralna a nih avangin kan ngai thiam thei lo," a ti.

MZP President chuan, "Vawi tam kan ngen hnuah pawh pension rawih nawn kaltlangpui a ni hi kan dem tak zet a, a tàwp thlengin kan do zel dawn," a ti a; "Sorkarin mi bik ni lo sum tam tak sênga a ruai nawn lui hi ṭhalai lehkhathiam hna zawng mekte zah lohna leh hmuhsitnaah kan ngai," tiin, pension rawih nawnna chu sût turin sorkar an ngen nawn leh tih a sawi.

MZP tarlan danin, Mizoram sorkarin Cooperation department-a pension a rawih nawn chu Lalrinsanga a ni a, additional registrar of cooperative societies aṭanga May 2022-a pension tawh a ni. Lalrinsanga hmun ruak luah turin sorkarin Maria G Ralte a dah tawh a, Maria G Ralte pawh July thla tawp khan a pension ve leh bawk.

MZP chuan vawiin hian Lalrinsanga pisa kai tur an dang dawn a, an ngenna a hlawhtlin loh chuan hma an la chhun­zawm zel dawn tih an puang a ni.