Khawpui Fai Intihsiakna ṭan a ni

Urban Development & Poverty Alleviation (UDPA) directorate-ah nimin khan Mizoram Khawpui Fai Intihsiakna hawn a ni. Hawnna inkhawm 'Virtual Launching of Mizoram Cleanliness Competition 2022' tih chu UDPA secretary Lalmalsawma Pachuau-in a hmanpui.

UDPA director H Lianzela, Swachh Bharat Mission (Urban) state mission director ni bawk kaihruai inkhawmah Lalmalsawma Pachuau chuan Swachh Survekshan 2023 Toolkit Mizo Version leh Mizoram Khawpui Fai Intihsiakna 2022 endikna tur MCC-22 Assessment Framework a tlangzarh a ni.

Lalmalsawma Pachuau chuan, faina lamah Mizoramin hmasawnna tam tak a neih thu a sawi rualin, "Hmabak tam tak kan la nei. Kan rama hmun nuam leh lên khawthawnna hmun kan neihte kan enkawl fai lo a, bawlhhlawh leh hnawm hnawk hmuh tur a tam hle," a ti.

UDPA Secretary chuan, hman khat daih sarâng (single use plastic) hman khap a ni chunga zawm a hlawh lo chu ngaih pawimawh a ṭul thu a sawi a; leivûng paihna hmun chungchangah ngaihtuahna sên nasat a ṭul thu leh ṭan lâk zel a pawimawh thu a sawi bawk.

Mizoram Khawpui Fai Intihsiakna 2022 hi nimin khan kalpui ṭan a ni a, December 31, 2022 thleng a awh dawn a, January 2023-ah result puan a ni ang. Kumin August-October chhungin online assessment tih tur a ni a, November-December chhungin endiktute'n khawpui hrang hrang tlawhin an endik bawk ang.

Intihsiakah hian Mizoram khawpui (notified town) 28-te chu category pathumah ṭhen a ni a; category I-ah Aizawla AMC ward hrang hrang an awm a, category II-ah district headquarter 10, category III-ah notified town dang zawng an awm thung.