Sum dinhmun chhia CM-in sum leh pái enkawl a thiam loh vang a ni lo - Lalchamliana

MNF adviser Lalchamliana, minister chuan nimin khan Mizo Hnam Rûna inkhawmah tunlaia Mizoram sum dinhmun chhe chungchang a sawifiah a; sum dinhmun chhiat chhan chu Finance department enkawltu chief minister Zoramthanga'n sum leh pái enkawl a thiam loh vang a ni lo niin a sawi.

Lalchamliana chuan, Mizoram chu sorkar laipuiah a la innghat nasa tih sawiin, "Mi ṭhenkhatte'n kan CM chu finance management a thiam loh vangah an puh a, mahse, sum leh pai enkawl thiam loh vang a ni lo. Kan hotute archuk tui lo khawpa sawisatute hi kan dinhmunah ding ve ta se, eng ruai an nih bik ka ring lo," a ti.

Mizoram budget-ah cheng vbc. 12,290 House-ah an pass tih sawiin Chama chuan, "State own tax leh non-tax revenue aṭangin kum khatah 10% velin kan pha lo a, state ṭhenkhat chu 60% deuh thawin an intodelh a ni," a ti a; sorkar laipui aṭangin Mizoramin tax devolution 0.50% vel a chang a, thla khata cheng vbc. 50 chan a neih ṭhin chu Covid vangin a tlahniam niin a sawi.

Lalchamliana chuan, kum kal meka Mizoram budget zinga vbc. 2646.64 chu CSS aṭanga hmuh tur a ni tih sawiin, "CSS hi hmasawnna tura central-in state a rawn pek hian state sorkar sum báwmah rei tak a táng ṭhin hi a ṭha lo em em. Tun hma chuan RBI-ah Mizoram hian account neiin, state-in sum kan hmuhte a lut khawm ṭhin a, kha khan sum kan hmuhna hrang hrangah min chhan a, tunah chuan khang kha a awm tawh loh avangin kan buai ta deuh ṭhin. Kan ṭhatna tur a nihte pawh ka ring," a ti.

Lalchamliana chuan, "Congress sorkar lai khan Pu Sawta kha finance a thiam an ti a, mahse, a hun laia a hmuh ang pawisa kha hmu ve ta i la, tu pawhin an thiam ang," a ti a; Congress sorkar laiin 14th Finance Commission-in state-ah sum a pe ṭha niin a sawi.

Political party hruaitute leh mipuiin rilru an thlâk a hun tawh tih sawiin Lalchamliana chuan, "Sorkarin tui/electric bill a tisang deuh a, opposition hoin inti ṭha fahranin an thlavâng an han hauh a. Tu pawh lo sorkar se la, politics-a inbeih nan kan lo hmang ṭhin hi i sim ang u. Keimahni inchâwm zo turin pên khat tê têa kan kal a ngai," a ti.

MNF Adviser sawi danin, budget-a chuang lo, loh theih loha sum hman ngaihna a tam a, RT-PCR khawl leina leh Covid dona atan sum tam tak hman a ngai a, sorkar laipui aṭanga hmuh tura beisei vbc. 2,600 hmuh a ni lo. Vawk pûl hri avangin zangnadawmna cheng vaibelchhe tél pek a ngai bawk.