Vanbawng Sub-Centre sak danah Hma la turin Health Minister phût

ZPM Ṭhalai chuan, Chalfilh bial chhung Vanbawng khuaa Health Sub-Centre sak a chhe hle nia sawiin, manṭang téltu an awm ngei an rin thu an tarlang a; a rang thei ang bera hma la turin Health Minister an phût.

Vanbawng Health Sub-Centre sak ṭhatna atan cheng tam tak ruahman a ni tih sawiin ZPM Ṭhalai thuchhuah chuan, "A ruhrel leh a ban hlui hman a nih bakah, rod hlui rinawm tawh lo leh chak ṭha tâwk tawh lote hman chhunzawm a ni. MNF sorkara duhdah taka hna thawh hi mipui thamlohna lian takah kan ngai a, a rang thei ang bera action la turin Health minister Dr R Lalthangliana kan phût a ni," an ti.

ZPM ṭhalaite chuan, sub-centre sak danah Vanbawng mipui rilru a nat hle laiin bialtu MLA Lalrinliana Sailo-in a ngawihsan tlat tih sawiin, "Vanbawng Health Sub-Centre sakah hian bialtu MLA hian manṭang a lo tél ve em ni, tih hi kan zawhna a ni," an ti a; sub-centre sak dan chhe tak avangin Khawzawl-Ngaizawl kawng siamna tur sum nuai 100 fanghma no eia Lalrinliana Sailo puh tawhna chu an hriat chhuah thu an tarlang.