KHAWTHLIR

Chawimawi dawn
Sports & Youth Services department chuan Commonwealth Games, 2022-a ritchàwi (weightlifting)-a India tana gold medal latu Jeremy Lalrinnunga an lawmpui thu nimin khan an tarlang a; Mizoram sorkar pawhin dan angin Jeremy-a chawimawina leh lawmpuina hlan a ni dawn tih a tarlang bawk.

Minister-in enfiah
Social Welfare & Tribal Affairs minister Dr K Beichhua chuan nimin khan Tanhrila Tribal Art Centre leh Ainawn Venga Senior Citizens Home a tlawh a, hna thawh mek leh chei ṭhat zel dan tur a enfiah. Minister hian Tribal Arts Centre-ah hian mitdel hawrawp chhutna khawl (Braille Press) an dahna tur hmunte a enfiah bakah, a cheiṭhat dan turte department official te nen an sawiho. Senior Citizen Home-ah hian Upate Run building thar an luah tawhte tlawhin, Dr K Beichhua hian a bul vel cheiṭhat hna thawh mekte a enfiah nghal a ni. Home-ah hian upa 10, hmeichhia 4 leh mipa 6 an enkawl mek a ni.

Mi 247 thlang
Champhai District Committee on PMMSY chuan nimin khan Champhai district-a PMMSY-a hmalakna hrang hrang pasariha dilna lut 449 aṭangin hmaṭhatna dawng tur mi 247 an thlang. PMMSY kalpui turin state sorkarin senso 60% leh mimalin 40% an tum dawn a, state sorkar sên tur aṭanga 90% chu sorkar laipui tum tur a ni.

Jeremy-a lawmpui
Peoples' Conference party leh BJP, Mizoram Pradesh chuan thuchhuah siamin, Birmingham, England-a Commonwealth Games 2022-a ritchàwi (weightlifting)-a gold medal latu Jeremy Lalrinnunga, Ainawn Veng chhuanawm an tih thu an tarlang a, a kal zelna turah duhsakna an hlân. BJP chuan Jeremy phû ang tâwk sum fai pe ngei turin Mizoram sorkar an phût a ni.

Ruihhlo dona
National Commission for Protection of Child Rights, State Commission for Protection of Child Rights leh Mamit DC pisa chuan nimin khan DC conference hall-ah 'World Day Against Human Trafficking' an buatsaih a; Combating Child Trafficking Campaign an nei nghal a ni.