Treasury-te'n ni 6 chhung sum an pe chhuak tawh lo

Mizoram sorkar sum dinhmun ṭhat loh avangin Mizoram sorkar treasury-te chuan sorkar chawlh tiam loin ni ruk chhung pawisa an pe chhuak thei lo tawh a, an pek chhuah leh theih hun tur hriat a ni lo.

Treasury zinga sum pe chhuak hnuhnung ber leh treasury lian ber Aizawl South Treasury-in sum an pek chhuah ni hnuhnung ber chu July 22, 2022 kha a ni a, chuta ṭang chuan chawlhkar khat chuang a liam tawh. Sorkar pisa kai ní bikah July 25 aṭangin treasury-te'n sum an pe chhuak tawh lo a, nimin thleng khan an la pe chhuak thei lo zel.

Tarlan tawh ṭhin angin, sorkar laipui thupek angin Mizoram sorkar chuan tun hnai khan CSS sum, March 31, 2022 hma lama dawn tawh, RBI-a state account-a awmte chu a hmang­tu tur department (state nodal agency) hnenah an pe chhuak a ni.

CSS sum pek chhuah tur zawng zawng chu RBI-a state account-a awmin a daih loh avangin RBI aṭangin Mizoram sorkarin sum a pûk a, overdraft hmanga sum pûk rulh hun hnuhnung chu August 4, 2022 tun kar Ningani hi a ni a, a rulh hman loh chuan trea­sury khâr a ngai dawn a ni.