NHIDCL-in forest clearance Min dilna a la rei lo - EFCC

Environment, Forest & Climate Change (EFCC) department hotute chuan, NHIDCL-in Vairengte leh Sairang inkar kawngpui four lane-a zauh turah forest clearance an dilna a la rei loh thu Vanglaini an hrilh.

NHIDCL hotute'n forest clearance-ah an beisei aia EFCC department an muan thu Vanglaini an hrilh chung­changah Kolasib DFO chuan, "NHIDCL hian forest clearance dilna hi package-3 (Vairengte-Chhimluang) atan July 29, 2022 khan an thehlut a, package-4 (Chhimluang-Kolasib) atan July 30, 2022 khan an thehlut," a ti a; dilna chu online hmanga thehluh a nih thu a sawi.

Kolasib DFO chuan, forest clearance dilna an hmuh aṭangin nimin kha first working day a nih thu sawiin, "Tihkhawmuanna hun pawh a la awm chiah lo. November 17, 2020 khan forest clearance dil turin kan ti daih tawh a, anmahni an muang zawk a ni," a ti.