Police lâk hun tur sawi thei rih lo

Home minister Lalchamliana chuan, Covid-19 vanga sum leh pai dinhmun a ṭhat loh avangin police lak hun tur sawi theih a nih loh thu a sawi.

Nimina Mizo Hnam Runa thu a sawinaah Lalchamliana chuan, "Covid-19 vanga sum leh pai dinhmun a ṭhat loh avangin engtikah nge police kan lak ang tih kan sawi thei lo a, a hrehawm hle. MLA te, NGO leh party lam pawhin kan indaih lohna hriain la turin min nawr ṭhin. Covid vanga sum indaih lohna a nasat em avangin kan la thei lo a ni. Post ruak 2,000 chuang a awm a, kum tin post 300 vel a awm tlangpui a, promotion, mitthi leh báng avangte'n vacancy a awm nual a ni," a ti.

Home Minister chuan, kuhva ro chung­chang sawiin, "Kuhva hrim hrim hi chu danin a khap a ni lo, mahse, foreign trade-ah Myanmar nen dan ang taka insumdawn tawnna kan la neih theih loh avangin central-ah Karnataka MP-te'n nasa takin min hek a, chuvang chuan khap a lo ni ta," a ti a; central thupek avangin khauh taka hma la turin order an chhuah ta tih a sawi a ni.