July 2022-ah hripui vei mi 3,694, chhuahtir 2,957, thihpui mi 7 an awm

Kumin July thla liam ta chhung khan Mizoramah Covid-19 vei mi 3,694 hmuh chhuah a ni a, June 2022-a hmuh chhuah 770 aiin 2,924-in a tam zawk. Hripui vei dam tawh mi 2,957 chhuahtir an ni a, hripui vangin mi pasarih an thi.

IDSP, Mizoram chhin­chhiah danin, July 2022 chhunga Covid-19 positive hmuh chhuah mi 3,694 chu chawhrualin ni tin mi 119 chuang hret (119.16) an awm ang a ni a, June-ah mi 25 chuang hret ang a ni thung.

July thlaa positivity rate chawhrual chu 24.18% a ni a, June thlaa 10.87% aiin a sang zawk hle. Positivity rate hi kumin January-ah 19.75%, February-ah 25.16%, March-ah 15.27%, April-ah 12.74% leh May-ah 9.06% a ni.

July 2022 chhungin swab sample 15,274 endik a ni a, June thlaa endik 7,086 aiin 8,188-in a tam zawk; May thlaah 9,747, April-ah 23,010 leh March-ah 64,611 endik a ni.

Thla liam ta chhunga Covid positive hmuh tam ber ní, ni 18-ah mi 280 hmuh chhuah a ni a; mi 200 aia tam hmuh chhuah ṭum ni thum awmin, mi 100 aia tam hmuh chhuah ṭum ni 20 a awm bawk. Positive hmuh tlem ber ní, ni 2-ah mi 15 hmuh a ni.

Hripui vei dam tawh July thlaa chhuahtir zat chu mi 2,957 an ni a, positive hmuh zat 3,694 aiin 737-in a tlem zawk. Chhuak an tam ber ní, ni 18-ah mi 481 chhuahtir an ni a, chhuak an tlem ber ní ni 12 leh ni 13-ah mi 12 ve ve chhuak an awm.

July 2022 chhung vêkin Covid-19 vei zinga mi pasarih an thi a; kum bikah June thlaah mi panga, May-ah mi pahnih, April-ah mi 11, March-ah mi 28, February-ah mi 47 leh January-ah mi 65 an thi a ni.