Covid-19 vei mi 62 hmuh chhuah belh

July 31, Pathianni khan Mizoramah Covid-19 vei mi 62 hmuh chhuah a ni a, July thla chhungin mi 3,694 hmuh a ni. Nimin khan hripui vei dam tawh mi 170 chhuahtir an ni a, Covid-19 vanga thi an awm lo.

Pathiannia hripui vei hmuh thar mi 62-te chu mipa 26 leh hmeichhia 36 an ni a; RAT hmanga hmuh chhuah vek niin, sample endik zat 322 aṭanga positivity rate chu 19.25% a ni. Endikna dang hmangin sample endik a ni lo.

Nimin khan Covid-19 vei inenkawl zinga mi 170 chhuahtir an ni a, district tina chhuak zat chu - Aizawl district-ah mi 71, Lungleiah 41, Serchhipah 12, Champhaiah 10, Khawzawlah pakua, Kolasib-ah pariat, Mamitah paruk, Hnahthialah panga leh, Siaha leh Saitualah pali ve ve a ni.

IDSP record angin, Mizoramah Covid-19 vei 2,32,800 hmuh chhuah a ni tawh a, mipa 1,08,408 leh hmeichhia 1,24,392 an ni a, mipa aiin hmeichhia 15,984-in an tam zawk. Nimin tlai dar 5 thleng khan mi 2,31,230 (99.33%) chhuahtir an ni tawh a, mi 710 (0.30%) thi tawhin, enkawl mek mi 860 (0.37%) an awm.

Nimin tlai dinhmun angin, Mizorama district 11 zingah Covid-19 positive awm lohna district a awm lo a; enkawl lai tamna ber Aizawl district-ah mi 312 an awm a, Lunglei district-ah mi 222 leh Mamit district-ah mi 103 an awm bawk.