Congress party-in Jeremy-a an lawmpui, Catch Them Young kalpui leh ṭha an ti

Congress party chuan thuchhuah siamin, Jeremy Lalrinnunga, Ainawn Veng, Aizawlin Commonwealth Games 2022, Birmingham-a neih mekah weightlifting-a gold medal a la chu lawmawm an tih thu leh an chhuan thu an tarlang a; Catch Them Young policy ṭha zawka kalpui leh ṭul an tih thu an sawi bawk.

MPCC chuan, Jeremy Lalrinnunga’n gold medal a lak theihna tura theihtawp chhuahpuitu India sorkar leh an coach-te chungah an lawm thu an tarlang a, "A bul ṭanna atana Catch Them Young hmanga kawng sah kuaksaktu, a hun laia Sports minister Pu Zodintluanga Ralte te, MSSC hotute leh hlawhtlinna ropui tak a chan theihna atana amah ṭanpuitu zawng zawng chawimawi an phu tak zet a ni," an ti.

Infiamnaa theihna bik nei naupangte dâwm kânna tur Catch Them Young chu Congress sorkar laiin SYS minister Zodintluanga hoin kalpui a ni tih sawiin MPCC chuan, "Infiamna lama talent nei ṭhate zawn chhuah leh dâwm kân hna nasa taka thawh a ni a, he policy hlawhtlinna hi sport discipline hrang hrangah hmuh tur tam tak a awm," an ti a; Jeremy Lalrinnunga pawh Catch Them Young hnuaia hmuh chhuah, Army Sports Institute-a zir tura kum 2011-a thawn a nih thu an sawi.

Congress party chuan, Mizoramah infiamnaa theihna nei ṭha naupang eng emaw zat an awm reng tih sawiin, "An talent hâi chhuaha tuai hriam a, awmze neia sport tihhmasawn nan a ṭul a, chu chu Catch Them Young-in a tum ber a ni. Congress party-in sorkarna kan chang leh a nih chuan Catch Them Young uar leh awmze nei zawkin kalpui leh ngei a ni ang," an ti.