Vawk vulhtu loan late harsatna sawiho

Champhai Special District Consultative Committee (DCC) chu nimin khan an chairman James Lalrinchhana, district bawrhsap hoin an ṭhukhawm a, African Swine Fever (ASF) léng vanga bank loan laa vawk vulhte harsatna chinfel dan tur an sawiho.

James Lalrinchhana chuan, bank-a thawkte chu mipui hnenah bank dawr leh bank kaltlanga hamṭhatna an dawn theihte zau zawka zirtir turin a chah.

SBI regional manager (RM) Rakesh Ravi pawhin thu sawiin, bank-te chu customer service ṭha tak pêk ngai pawimawh turin a chah a, "Mipui leh ṭanpui ngaite pui tur kan nih angin theihtawp kan chhuah a ṭul. ASF vanga vawk vultute'n harsatna an tâwk hi a pawi tak zet a, bank kaltlangin dan tlawhchhanin ṭanpui dan ngaihtuah a ṭul," a ti.

Ṭhutkhawma tarlan danin, ASF thawh hnihna, February 4, 2022 aṭanga July thla thlengin Champhai district-a khua/veng 40-ah chhungkua 601-te vawk 3,765 a thi tawh a, vawk 4,182 suat a ni tawh. June 2022 thleng khan vawk thi leh suat vangin cheng nuai 600 vel an hloh tawh a ni.

Meeting-ah hian bank loan lak rulhna turah ASF vanga harsatna neite tana ngaihhnathiamna awm theite tarlan a ni a; loan rulh hun chhung pawhsei, loan rulh chawlh lailawk, ran vulhtute dilna leh remchan dan anga loan kalhmang siam rem theih dan turte an sawiho a ni.

Loan latu, ASF tihbuaite'n an harsatnate ziakin bank manager hnena an thlen dan tur leh chumi atana inzirtirna siam a nih theih nan bank branch-te chu chawlhkar khat chhung Financial Literacy Campaign buatsaih vek tura tih an ni.