CM duhsak zawngte thup tum vangin RTI zawhna an chhàng ṭha lo - Congress

Mizoram Pradesh Congress Committee (MPCC) Viligance Cell chuan, chief minister Zoramthanga'n contractor leh supplier a duhsak záwngte thup duh avangin RTI Act hmanga zawhna an chháng duh loah an ngai a; nimin khan chief information commissioner (CIC) Lalnunmawia Chuaungo hnenah an zualko.

MPCC Viligance Cell chairman C Ngunlianchunga, MLA chuan, Mizoram sum dinhmun a harsat em em laiin Chief Minister duhsak zawng contractor leh supplier-te'n awlsam takin bill an la zung zung thei thoa hriat a nih avangin an secretary Lalhruaitluanga Bawitlungin RTI Act hmangin Directorate of Account & Treasuries SPIO hnenah July 15, 2022 khan zawhna a zawt tih a sawi a, "Zawhna hi fiah lo taka an rawn chhàn avangin thu dik zêp tumnaah kan ngai," a ti.

C Ngunlianchunga chuan, chhànna a fiah tâwk loh avangin July 18, 2022 khan thuneitu sang zawk hnenah appeal siam a nih thu sawiin, "Account & Treasury department hian record an neih loh avangin chháng thei an nih loh thu July 27, 2022 khan hriattir kan ni," a ti a; RTI Act hmang an zawhnate chu record awm vek nia an hriat avangin CIC-ah an zualko ta tih a sawi.

Tu emaw bill treasury-a tlang awlsam bik a awm em tih an chhui mek chu mipui hriat an hlauh vanga RTI Act hmang zawhna chhan a ni lo em ni tih chu an zawhna a nih thu sawiin Ngunlianchunga chuan, "CM-in a unaute sum a kawl ang khan, Kamrula nen hian account an lo inṭâwm tak tak em ni tih hi kan zawt nawn a ni. CM department enkawl hian RTI Act hi dik takin min chhang thuai turin kan phût," a ti.

MPCC Viligance Cell zualkona chung­changah hian CIC Lalnunmawia Chuaungo chuan, RTI Act hnuaiah dan a awm a, chu dan chu an zawm mai tur a nih thu a sawi a, uluk taka an lo zir chian tur thu MPCC Vigilance Cell hruaitute a hrilh.

MPCC Viligance Cell chuan, sorkar hna­thawkte'n hlawh an lâk mumal theih loh lai te, GP fund an lak theih loh lai te, pension-a chhuakte'n sum an chhuahpui tur an hmuh theih loh laite leh mirethei zawkte'n damdawi-ina an inenkawlna man pawh an lâk theih lo laia CM duhsak zawng contractor leh supplier-te bill awlsam taka pek chhuah a ni ṭhin chu an dem tak zet thu an tarlang.