ZPM-in vegetable market zirhona buatsaih 'Thlai thar lei leh hralhna kan buaipui dawn' - ZPM President

ZPM Research Wing chuan nimin khan Tourist Lodge, Chaltlangah thlai thar lei leh hralh chung­chang zirchianna, 'Work­shop on vegetable market' an buatsaih. ZPM president Lallian­sawta chuan, thlai thar lei leh hralhna chungchang chu ZPM an sorkar a nih chuan an buaipui tur pawimawh tak a nih thu a sawi.

Lalliansawta chuan, sorkar an siam hunah bangbo lo leh a ngaihna hre lo taka an kal lohna turin zirchianna a pawimawh tih sawiin, "Kan ramah thlai a ṭha duh hle. Tun hma aṭangin sorkarin chíng rawh u a ti a, kan chíng a, kan thar mai; mahse, a hralhnaah kan buai leh ṭhin. Kut hnathawktute'n hah leh rim taka an thawh chhuah chu a ṭawih ral mai mai ṭhin a ni," a ti.

ZPM chuan zirchian­na hmangin policy an siam tih sawiin Lallian­sawta chuan, "Hei tak hi a chhuanawmna lai a ni. Kan mithiamte'n a kuma kum policy an buaipui a, duan chhuahin a lo awm ta. Pathian zarah lo sorkar ta pawh ni ila, kan leklam tur pawimawh tak a ni," a ti a; zirchianna buaipuitute fakawm a tih thu a sawi.

ZPM President chuan, sorkarna an siam a nih pawhin ṭan rual a pawimawh ber tih sawiin, "Khua leh tuite him loa an inhria a nih chuan lal, upa, val upa leh pasalṭhate an fel tawk lo a ni mai. ZPM hi party kalkham tibuai khawpin kan la kal lo niin ka hria. Pathian zarah kan kal zel ang a, kan sorkar ngei pawh kan beisei hle. Tun hmaa Congress leh MNF ringawt, tlanchhiatna tur dang awm chuang si lo ang kha a ni tawh lo. Vawiina kan buaipui hi a nih anga hmang thei turin, Pathian hmanrua ni thei turin inbuatsaih ang u," a ti.

ZPM working presi­dent K Sapdanga pawhin thu sawiin, "Kan sorkar huna kut hnathawktute tana hmalak dan tur leh malsawmna an dawn theih tur ngaihtuah hian a nghahhlelhawm hle. Vawiina kan thil sawi hian khawtlang hmasawnna bakah kohhran hmasawnna a hawlh thleng thei a ni," a ti a; an thil sawite a taka a chan theih nan thawhrim a pawimawh ber tih a sawi.

Thlai hralh leh lei chungchang zirhonaah hian ZPM MLA leh councillor te, an party hruaitute leh sàwm bikte an tel a; mithiamte'n thlai thar hralh leh lei chungchang an sawifiah a ni.