MNF sorkar hian a intiam ang ngeiin Cheng nuai thum sem rawh se - MPCC

Mizoram Pradesh Congress Committee (MPCC) Media department chuan, MNF president Zoramthanga'n kum 2018 inthlan hmain NLUP dawng tawh pawh SEDP hnuaiah cheng nuai thum an pek tur thu a sawi thu an tarlang a, "An intiam ang ngeia Rs 3,00,000 sem turin MNF sorkar kan phût a ni," an ti.

MPCC Media hruaitute chuan nimin khan Aizawl Press Club-ah thuthar thehdarhtute an kâwm a; an secretary C Lalhriatpuia chuan, kum 2018-a ZONET Cable TV-in inthlan thlirlâwkna a buatsaihah Zoramthanga'n SEDP hnuaia Rs 3,00,000 sem an tum chu 'Kum 5 chhung, term khat project a ni a, kum tin Rs 60,000 a ni a, thla tin Rs 5,000 a ni mai a. MR hlawh pawh a zat lo a, thil harsa tur a ni lo,' tia a sawi thu a sawi a, "Mipuiin beiseina sang tak nen kan thlang tling ta reng a ni," tiin, kum thum leh a chanve chuang an sorkar hnuah pawh SEDP dawng sawi tur an awm loh thu a sawi.

C Lalhriatpuia chuan, June 28, 2022 khan deputy chief minister Tawnluia'n Khawhaiah July 2022 chhungin DC tin aṭangin chhungkaw 60,000 hnenah SEDP ṭanpuina Rs 50,000 zel sem tura ngaih a nih thu a sawi tih tarlangin, "Hei hian MNF party chhungah leh thingtlang kut hnathawktu rethei tak takte rilruah beiseina sang tak a siam a, July thlaa SEDP ṭanpuina Rs 50,000 dawn mai inbeisei chhungkaw sang tam tak an awm a ni," a ti.

August 2, 2022 thlengin SEDP ṭanpuina dawng chhungkua sawi tur an la awm lo nia sawiin Lalhriatpuia chuan, "July thlaa SEDP sem a nih tur thu chiang taka sawi a, MNF party worker-te leh mipui hnena beiseina sang tak pe a, tihlawhtling leh si lotu Dy CM hian mipui hmaah thupha a cháwi ngei turah kan ngai," a ti a; Dy CM chuan Tuichang bial leh Mizoram mipui beiseina sang tak a siam chu beiseina lem a ni tih a chian thu a sawi.

MPCC Media tarlan danin, MNF-in kum 2018-a sorkarna an siam hnuin budget ṭum li an pharh tawh a, budget-ah SEDP atan cheng vbc. 1,913 dah a ni a, mahse, SEDP hnuaiah Rs 3,00,000 sem a la ni lo.

Zawhna chhangin MPCC Media hotute chuan, tunlai hi SEDP sem hun tak nia an hriat thu an sawi a, "Sorkar hnathawk hlawh lâk hun tur a hriat lo a, supply leh contract bill a táng nasa si. Khawtualah sum léngvâk a tlem a, an sem dawn a nih chuan SEDP sem hun lai tak a ni," an ti.