MZP-in Addl RCS pisa kái tur an dang

MZP, General Headquarters chuan Cooperation department-a additional registrar of cooperative societies (RCS) pension tawh rawih nawn mek Lalrinsanga pisa kai tur nimin khan an dang. MZP hian August 1 khan pension tawh rawihna thupek copy an hâl tawh a, kawngzawh turin an inbuatsaih mek bawk.

MZP hian Addl RCS pension tawh Lalrinsanga rawih nawn ṭha an tih lohzia lantir nan leh pension rawih nawnna thupek sût phûtin nimin chawhma khan RCS pisa kawtah an pungkhawm a, Addl RCS pisa kái tur an dang. Lalrinsanga hian ni thum chawlh a lâk avangin chawhma dar 11-ah an ṭîn darh a ni.

Nimin vêk khan MZP chuan hma an lak zel dan tur an ngaihtuah nghal a, MZP hruaitute bakah, Aizawla college hrang hranga students' union hruaitute an tel. MZP chuan, addl RCS atana Lalrinsanga rawih nawnna thupek chu August 4, 2022 (Ningani) ral hma ngeia sût turin sorkar an phût a; sut a nih loha hmalak dan tur an rél a ni.

MZP INRUAHMAN DAN
1) August 5, 2022-ah Addl RCS pisa kai tur dan leh a ni dawn.
2) August 8, 2022-ah Cooperation minister C Lalrinsanga pisa kai tur dan a ni ang.
3) Zirlai, ṭhalai leh mipui a tam thei ang ber nen kawngzawh tum a ni.