Hrilh lâwk loa leiṭha endik rêl

Champhai District Vigilance Committee on Fertilizer chu an chairman James Lalrinchhana, bawrhsap hoin nimin khan DC conference hall-ah an ṭhukhawm a, leiṭha (fertilizer) kaihhnawih thilte hrilh lâwk loa endik ṭhin an rél.

Ṭhutkhawmah hian District Vigilance Committee on Fertilizer inkaihhruaina leh hmalak dan tur te, dan tlawhchhan hrang hrangte an zirho a; dan loa leichi lak luh, kawl leh tawlh rûk vennaah ṭan lak a ṭul thu tarlan a ni.

July 29, 2022-a dan loa leichi (urea) ip 500 vel tawlh rûk man chu kudam remchangah daha endik an rél a, remchang hmasa berah loneitute lei theih tura zawr chhuah ni se an ti. Sorkar dan angin, ip khat Rs 450 zela hralh tur a ni a, khairual zawka sem a nih theih nan mi pakhat tan ip pahnih zel hralh an rél.

Sorkar pawmpuia leiṭha/leichi zuartu ni lo, state dang leh district dang qouta leiṭha tawlhte chu man zel tura tih a ni a; district qouta-te pawh hmun danga tawlh rûk a nih loh nan thlithlai ni se, an ti.