LRSWC department ram mimal tana ṭheh tum Kolasib ZPM-in an duh lo

ZPM Ṭhalai, Kolasib Block chuan, Kolasib Khuangpuilam VC huam chhunga Land Resources, Soil & Water Conservation (LRSWC) department ram chu MNF party-te'n mimal ram atan ṭheh an tum tih sawiin, pawi an tih thu leh an dem thu an tarlang a, an dodal tur thu an puang.

Kolasib ZPM Ṭhalai hruaitute chuan nimin khan Kolasib Press Club-ah thuthar thehdarhtute an kâwm a; "Sorkar ram pawimawh leh hlu tak mai hi dan palzûta party mal hamṭhatna leh vote zawnna atan kan phal lo a, a tàwp thlengin kan dodal tlat dawn a ni," an ti.

In hmun lo ram nei lo, mamawhtute tana in hmun pek an dodal lo tih an sawi rualin Kolasib ZPM ṭhalaite chuan, "Dan hnuaiah sorkar kalphung pangngai takin House Site Selection Advisory Board (HSSAB) kaltlangin in hmun mamawhte tana dilna hun siamin, tlangzarh ni rawh se tih hi kan dinna a ni," an ti a; dan ang leh kalphung pangngai ang ni loa MNF party-in an mi leh sate duhsakna atana sorkar ram an hman chu an duh loh thu an sawi.

ZPM Ṭhalai chuan, MNF sorkar thil tih tum dan chu Kolasib hma hun ngaihtuah loh thlak an tih thu sawiin, "Ruling party nih vanga dan palzûta hma an la hi kan dem hle. An duh hun hunah dan an ngai pawimawh a, an hamṭhatna turah dan an palzût leh mai ṭhinna hian MNF hi ram rorelna fawng chelh tlak an nih lohzia a tilang," an ti.