Thla li leh a chanve hnua hripui vei Hmuh chhuah tam ber ní a thleng

August 1, Thawhṭanni khan Mizoramah Covid-19 vei mi 337 hmuh chhuah a ni a, thla li leh a chanve hnua hmuh chhuah tam ber ní a ni. Nimin khan hripui vei dam tawh mi 150 chhuahtir an ni a, Covid-19 vanga thi an awm lo.

Thawhṭannia hripui vei hmuh thar mi 337-te chu mipa 173 leh hmeichhia 164 an ni a; RAT hmanga hmuh chhuah vek niin, sample endik zat 1,249 aṭanga positivity rate chu 26.98% a ni.

Covid-19 positive hmuh thar zat, 337 chu thla li leh a chanve hnua hmuh chhuah tam ber ní a ni a; ni 138 kal ta, March 14, 2022-a positive hmuh zat 494 hnua mi 300 aia tam hmuh chhuah lehna hmasa ber a ni.

IDSP record angin, Mizoramah Covid-19 vei 2,33,137 hmuh chhuah a ni tawh a, mipa 1,08,581 leh hmeichhia 1,24,556 an ni a, mipa aiin hmeichhia 15,975-in an tam zawk. Nimin tlai dar 5 thleng khan mi 2,31,380 (99.25%) chhuahtir an ni tawh a, mi 710 (0.30%) thi tawhin, enkawl mek mi 1,047 (0.37%) an awm.