Sorkarin company 5-te chhiah Rs. 12,42,35,730 a àwltir tawh

Mizorama sorkar hnuaiah kum 2010 aṭang khan Mizorama hna thawktu company zinga panga chu chhiah, value added tax (VAT) a àwltir a, an chhiah âwl zat chu Rs. 12,42,35,730 a ni. VAT dan ang chuan, eng emaw vanga chhiah awltir a nih dawn chuan government gazette chhuah tur a ni a; company/firm pahnihte chhiah àwltirna turah gazette chhuah a ni lo.

Mizoram VAT Act 2005, Section 47-in a sawi dan chuan, VAT àwltir a nih dawnah sorkarin gazette a chhuah hmasa tur a ni a; mahse, company/firm pahnihte VAT a àwltir dawnah hriattirna a tichhuak hmasa lo ve ve.

Vanglaini-in RTI Act hmanga Taxation department-a a zawhna SPIO-in a chhan danin, chhiah a àwltir zinga hriattirna a chhuah hmasak lohte chu - UDPA department hnuaia Rajiv Awas Yojana scheme aṭanga VAT pek tur leh North East Consultancy Services (NECS)-in VAT an pek turah a ni.

MVAT Act 2005 Section 47-ah chuan, "Sorkarin vantlang ṭhatna turah a ngai a, ṭul a ti a nih chuan, official gazette-a hriattirna tichhuakin, mimal/dealer hnenah chhiah an chawi tur chu a vaiin emaw, a ṭhen a zar emaw a àwltir thei ang. Chhiah àwlna hi official gazette-a hriattirna tihchhuah a nih aṭangin emaw April 1, 2005 aia hma ni lo hun chhunga chhiar tur a ni," tia ziah a ni. Hetih lai hian, company pakhat chu MVAT Act Section 12 hmanga àwltir a ni thung.

Taxation department-a VAT pe tur ni si, sorkarin public interest-a a ngaih vanga MVAT Act Section 47 hmanga Taxation department-in hriattirna a chhuah hmasak ber chu February 11, 2010 kha a ni a, mi pahnih tan ṭum khatah hriattirna a tichhuak.

Hriattirna hi Taxation secretary Lalthan­sanga'n a chhuah a, chhiah àwl tura tihte chu T&T Project Ltd., Venghlui, Aizawl leh Satnam Global Infra Projects Ltd., Venghlui (Zoluta Building), Aizawlte an ni.

Firm pahnihte hian Rajiv Gandhi Grameen Vidyutikaran Yojan (RGGVY) hnuaiah Power & Electricity department hna Mamit, Kolasib, Aizawl leh Champhaiahte hna an thawk. An hna aṭanga T&T Project-in VAT a pek tur chu Rs. 7,51,03,824 a ni a, Satnam Global Infra Projects-in VAT an pek tur Rs. 3,52,80,791 a ni. Firm pahnihte chhiah awl zat hi a vaiin Rs. 11,03,84,615 a tling.

Kum 2012-13 khan PHE department hnuaia Greater Khawzawl Water Supply Scheme hna thawhna aṭanga VAT pek tur Rs. 4,53,097 chu awltir a ni a, VAT àwlna tur hriattirna chu Taxation secretary RL Rinawma'n December 13, 2013-ah a chhuah. VAT âwltirna lehkhaah hian a ṭum khatna a nih thu leh MVAT Act Section 12 hmanga âwltir a nih thu ziah tel a ni.

Taxation department chuan MVAT Act Section 47-in a phût ang hriattirna tichhuak loin mi pahnih hnenah chhiah a awltir thung. UDPA department hnuaia pilot project, Rajiv Awas Yojona (RAY) project hnuaia mi niin, VAT chawi tur Rs. 7,34,600 àwltir a ni.

UDPA chhiah àwltirna tur hian October 24, 2016-ah Taxation Under Secretary-in Commissioner of Taxes hnenah ziakin a thlen a; Under Secretary lehkha chu sorkar lehkha kal pangngai a ni a, government gazette pangngai ang a nih loh avangin MVAT Act Section 47 anga kalpui a ni lo.

Kum 2016-17 chhunga NECS-in VAT an pek tur Rs. 1,26,63,418 pawh àwltir a ni. NECS chhiah àwltirna turah hian gavernment gazette chhuah a ni lo a, March 16, 2017 khan Taxation Under Secretary-in Commissioner of Taxes hnenah sorkar lehkha kal pangngai anga a thlen erawh a awm thung.