Cement company-te'n Mizote Min bum nasa hle - MSU

Mizo Students Union (MSU) hruaitute chuan nimin khan an pisaah thuthar thehdarhtute an kâwm a; cement company-te'n Mizo mipuite an bum nasa a, state danga an sum hloh hmuh letna atan Mizoram an hmang niin an sawi.

MSU president RB Lalmalsawma chuan, Mizoramah cement company pariat an awm mek tih sawiin, "Company-te hian carry and forward (C/F) neiin, an hnuaiah dealers an awm ve leh a, Mizoram pumah cement an zuar ṭhin. Mizoram pumin thla khata cement kan hman ral zat hi bag 3,00,000 - 5,00,000 inkar a ni tlangpui," a ti.

RB Lalmalsawma sawi danin, Mizorama cement C/F Way Bill hmanga phurh luhte chu company kudamah a lut a, non-trade ho chuan anmahni awmna hmunah an tlangpui nghal ṭhin. Non-Trade Way Bill-te hi anmahni hman tur anga dil an nih angin hralh chhuah a thiang lo a, chutih rualin Mizorama cement dealer leh company ṭhenkhat, cement VAT nei leh way bill neite chuan an zuar chhawng leh ṭhin a ni.

Taxation department chu Non-Trade Way Bill khauh taka kalpui turin an ngen thu sawiin MSU President chuan, "Hetiang tih ching man kan nei a nih chuan a mualphothlak hle dawn. A theih phei chuan non-trade hi tihtawp vek ni se, cement mamawh company lian leh contractor emaw an awm a nih chuan C/F kaltlangin lei mai se, hei hian black marketing a tihtawp theih kan ring," a ti.

RB Lalmalsawma chuan, cement rate an zirchianna leh state dangte nena kan inthlauhna te, non-trade hoin an lei theihna zatte an khaikhin vek hnuah, Mizorama cement man a sang uchuak hle tih an hriat thu a sawi a, "Cement company-te hian chhun zan zawmin min bum reng a, state danga eng emaw chhiatna vanga an sum hlohte hmuh let nan min hmang nasa tih hi kan hmuh dan a ni," a ti.

MSU tarlan danin, tunah hian company-in Agartala-a cement an tihthlen theihna te, Silchar-a an pekna te, Mizoram chhunga company liante hnena an pek theihnate nen hriat a ni tawh. Cement-te chu Meghalaya state-a Jowai leh a chhehvel aṭanga phurh luh deuh vek a ni a, chuta ṭanga Agartala leh Aizawl hlat zawng inthlauhna chu km. 30 aiin a tam lo a ni.

Tlang ram leh phai zawla diesel hman zat inthlauhna pawh a tam lutuk lo niin an sawi a; chuti chunga Aizawl leh Agartala-a company-in cement an thlentir theihna rate chu company hrang hrangte rate lak khawmin, Rs. 80 -100 inkar deuh vek a ni.

Cement company pariatte hian thla khat chhunga Mizoram aṭanga hlâwkna an hmuh chu cheng nuai 200 - 400 chuang a ni a, kum khata an hlâwkna chu cheng nuai 2400 - 4800 inkar vel a ni.

Company-in rate an siam chu state sorkarin a duh thua a bituksak ngawt theih a ni lo tih sawiin MSU President chuan, "GST pawh hi hman ni ta se, India rama state zawng zawng rate chu a inang dawn lo. Tunah hian Silchar nena kan inthlauhna hi Rs. 50-60 inkar vel a ni a, meeting-a lo kalte report aṭang chuan a inthlauhna hniam lai ber a ni," a ti.