Sports infrastructure lamah sorkarin Nasa takin hma a la - CM Hawla

Chief minister Lal Thanhawa chuan, sport discipline hrang hrang tihhmasawnna atan Mizoram sorkarin infrastructure lamah nasa taka hma a lak thu a sawi.

Hmarchhak huap, thla khat awh tur 1st. North East India Boxing Coaching Camp hawnna nimina Synod Conference Centre-a neih a hmanpuinaah Chief Minister chuan, "Sorkarin sport discipline hrang hrang tihhmasawn nan infrastructure lamah nasa taka ṭan a la a, infiamna hmunhma ṭha tak tak a din a ni. Hengte hi infiammite'n ṭangkai takin an hmang mek a ni," a ti.

Lal Thanhawla chuan, hmarchhak state-te'n contact sport hrang hrangah theihna an neih ṭhat thu sawiin, "Contact sport-ah hian hian talent kan nei ṭha a, training leh coaching a tam thei ang ber buatsaih a ṭul. Mizoram district zawng zawngah boxing hall leh boxing ring-te dah a ni tawh," a ti a; sipai team-ah Mizo boxer-te'n hming an chher mek thu a sawi.

India ramah infiamna lama inrelbawlna chungchang sawiin CM Hawla chuan, "Khawvel huapa inelnaah infiammite thlannaah inthliarna leh induhsakna a awm ṭhin hi a pawi hle. Inthliarna hi a reh hma leh a thiam ber berte chauh thlan an nih loh chuan khawvel huapa India hian hlawhtlinna kan chang sang loang tih a hlauhthawnawm a ni," a ti.

Chief Minister hian Mizoram Boxing Association Competition Rules chu a tlangzarh nghal a ni.

Coaching camp hawn inkhawm hi MIZBA president Dr Zoramthanga'n a kaihruai a, India tana medal la tawh Zoramthanga (L) chhungte leh Jenny R Lalremliani hnenah thilpek hlan a ni.

1st North East India Boxing Coaching Camp hi North Eastern Council ṭanpuinaa buatsaih a ni a, MIZBA-in a ṭul zawng zawng an buaipui a, technical assistance chu Boxing Federation of India-in an tum thung.

Camp hi July 18, 2017 thleng awh tur a ni a, hmarchhak state pariat aṭangin boxer 50 chuang an tel dawn a ni.