Khawbungah education awareness campaign

Tuipuiral Zirlai Pawl (TZP) chuan, nimin khan Khawbung community hall-ah Education & Moral Awareness Campaign an buatsaih a, Champhai DC Vanlalngaihsaka'n a hmanpui.

Vanlalngaihsaka chuan, zirlai kal khawmte chu tum mumal nei tur leh all India service-a luh tum turin a fuih a, "All India service-a lutte hi Mizote hmel ti-mawitu an ni a, hranghlui leh mi hmasate kawng lo zawh tawh hi ṭhangtharte'n zui ve a ngai. State páwn lama Mizo officer awmte'n Mizo zirlaite tan ṭangkaina an ngah hle a ni," a ti.

TZP president Vanlalsailova chuan, campaign an buatsaih chhan chu, kumin 2017 HSLC result chhuakah Tuipuiral huam chhunga high hchool tam zawk result a tlakhniam vang a ni tih a sawi a; zirtirtu indaih loh vangin zirlaite’n zirnaah harsatna an tâwk a, sorkar leh khawtlang puihna an mamawh tih a sawi bawk.

Campaign-ah hian Tuipuiral huam chhunga high school leh higher secondary school aṭang-in zirlai 506 an tel a, Champhai additional DC CC Lalchhuangkima leh Champhaia election officer Lalremruata Kullai ten zirlaite chu thil pawimawh hrang hrang an zirtir a ni.