KHAWTHLIR

Vehbûr khawn tum
Tun hnaia Mizoram hmun hrang hranga lei min leh tui lian tuarte ṭanpui nan Tahan, Myanmar-a Kalay Mizo Ṭhalai Pawl chuan vehbur khawn an tum. Thu dawn danin, KMTP hian MṬP dinna khaw tinah ṭanpuina vehbur khawn turin an hriattir a, chu'ngte chu August 15, 2017 hmain an hmunpuia pe lut turin an ti.

MGNREGA zirho
State Institute of Rural Development and Panchayati Raj chuan nimin khan an conference hall-ah 'Training on Preparation of Labour Budget for Programme Officers' an buatsaih a; BDO leh APO-te chu MGNREGA hnuaia labour budget siam dan leh barefoot technician chungchang zirtir an ni.

Lehkhabu tlangzarh
PC Muanthanga lehkhabu ziah, 'Lungrem hrang hrang' tih chu nimin khan Aizawl Press Club-ah Synod senior executive secretary Rev. Lalramliana Pachuau-in a tlangzarh.

Thisen pe
JC Security chuan nimin khan blood donation camp an huaihawt a, mipa 30 leh hmeichhia pakhatte'n Aizawl Civil Hospital-ah thisen unit 31 an pe.

Tlan phal lo
Traffic SP chuan thupek chhuan Ramhlun South leh Chanmari inkar kawngpuiah leikhi a awm avangin mipui him nan leh chhiatna nasa zawk a thlen loh nan lir-thei lian 407 leh a chunglam tan helai kawngpui ah hian chhim leh hmar panin tlan a khap. Lirthei lian Bawngkawn lam aṭanga Aizawl khawpui laili lo lut tur te chu Falkland Veng, World Bank Road ah kalin Zampuimanga lungphun aṭangin Kulikawn lam atanga luh tur a ni. Thupek hian passenger phur bus a huam lo.

Hindi zirtirtute lawm
Mizoram CSS Hindi Teachers’ Association chuan thuchhuah siamin, Union Home Minister-in chief minister Lal Thanhawla hnenah, Mizorama CSS hnuaia Hindi zirtirtute an thawk chhunzawm leh ngei tur thu a hrilh avanga an lawm thu an tarlang a, a rang thei ang bera appoinment order tichhuak turin sorkar an ngen.