CYMA-in vehbûr a khawn dawn

Tun hnaia Mizorama lei min leh tui lian tuarte chhawmdawlna atan Central YMA chuan YMA branch tinah vehbûr khawn a tum.

June 19, 2017 zana Central YMA Executive Committee meeting chuan, vehbûr hi YMA branch kaihhruanain chhung tinah khawn turin a ruahman a; chhiat tawkte ṭanpui nan pawisa thawh tura ngenin, "Ṭhahnemngai taka mahni remchan ang ang lo thawh ve turin chhung tinte kan ngen a ni," an ti.

Mizoram chhung leh páwna pawl hrang hrangte pawh an remchan anga ṭanpui tura hma la turin a ngen a; ṭanpuina pe duh tan CYMA bank account (Mizoram Rural Bank) no. 97003624845 (Khatla Branch)-ah July 31, 2017 thleng thehluh theih a nih thu an tarlang.

Central YMA chuan, tun hnaia Mizorama ruahsur vanga chhiat tawhna hrang hrangah nunna chán eng emaw zat an awm chu pawi an tih thu leh thihna tâwk chhungkuate an tawrhpui thu an tarlang a, "In leh lo chán chhungkua 650 chuang bakah, huan thlai leh eizawnna eng emaw zat chán an awm hi pawi kan tiin kan tuarpui tak zet a ni," an ti.