PHE Minister-in tui ren turin mipui a ngen
PHE minister Zodintluanga chuan nimin khan Tlawng lui, Reiek kaia Aizawl châwmtu tui lakna hmun a tlawh. Minister chuan, PHE tui lakna chuan ngai a la awh loh avangin tui ren turin Aizawl mipui a ngen.
Zodintluanga hian June 13, 2017-a ruahsur nasa vanga Tlawng tui lianin lui aṭanga Greater Aizawl Water Supply Scheme (GAWSS) hmanga tui pump-na (submersible pump) a tihchhiat a tlawh a ni.
PHE Minister chuan, Aizawl mipuite chu tui renchem tura chahin, "Lui aṭanga tui pump chhuahna khawl chhia zinga pakhat chu June 19 zan khan siamṭhat niin tui pump ṭan a ni leh tawh a. Kar khat chiah chiah a a chhiat hnuah Phase-II chu a zatve pump chhuah theih a ni leh tawh. Ni khata Phase-II in a pump theih zat hi 22 mld vel a ni a, tunah hian 10 mld vel pump mek a ni," a ti.
GAWSS Phase-I pawh lui aṭanga tui pump chhuahna khawl submersible pump a chhia tih sawiin Zodintluanga chuan, "Hei vang hian lei hipna thâ (gravity) hmangin Vaipuanpho tui lak chu pump chhuah a ni," a ti a; ni khata darkar 24 chhungin 8 mld pump chhoh a nih thu a sawi.
PHE executive engineer Thanchungnunga sawi danin, submersible pump hi Tlawng lui aṭanga tui pump chhuahna khawl a ni a, kum danga tui a len laiin tuiin ft. 20 vel a chîm ṭhin laiin, tun hnaia tui len lai khan ft. 50 chuang a chîm a, kum 1997 hnua a chîm san ber ṭum a ni.
Khawlah hian chirh a luh tam avangin hna a thawk thei lo a, Raw Pumping Station One-a submersible pump pali zinga pakhat chiah tunah a chuan hman theih a ni.
Zodintluanga chuan, chirhin a tihbuai vanga khawl nung thei lo chu tui a la len avangin siam ṭhat mai theih a la ni lo tih a sawi rualin, PHE department-a thawktute chu mipui dinhmun hre chunga theihtawp chhuah turin a fuih a; "Mipui hriatthiamna kan ngen a, a pangngaia awm leh turin kan chin hriat a la nih loh avangin mipuite tui renchem turin ka ngen a ni," a ti.
PHE Minister chuan, Tlawng tui ring loa gravity hmanga Dihmunzawla Serlui tui lakna pawh a chhiat tel thu a sawi a, "Fûr laia kan rin ber tur Serlui gravity a chhe tel a, hmun hnih laiah pipeline a chhia a. Hna thawktute'n siamtha turin chak takin chhun zan zawmin hma an la mek a ni," a ti a; Serlui gravity a ṭhat chuan fûr lai chuan Aizawl a châwm theih thu a sawi a ni.