MSU leh ACCJSU hruaitute Court-a inlan tura koh an ni

January 2016-a Mizo Students Union (MSU)-in Persons with Disabilities (PwD) commissioner B Sairengpuii rawih nawn duh lohna lantira kawng an zawh leh PwD Commissioner pisa an dan chungchangah, Aizawl District Court chuan MSU hruaitu ṭhenkhatte leh Aizawl City College Joint Students Union (ACCJSU) hruaitute chu August 2, 2017-ah Court-a inlan turin a ko.

MSU hruaitute hnen aṭanga thu dawn danin, Court aṭanga inlan tura kohna hi June 19, Thawhṭanni khan an dawng a; Court-in a kohte chu MSU hruaitu hlui mi pali, MSU hruaitu ni mek mi pahnih leh ACCJSU hruaitu hlui mi paruk an ni.

PwD Commissioner pisa dan laia MSU General Secretary chuan, Court-in inlan hun tura a ruatah hian inlan ngei an tum thu Vanglaini palai a hrilh. Thubuai an neih chhan chu PwD commissioner hlui B Sairengpuii'n complaint a thehluh vang ni loin, police lamin thubuai an ziah luh vang niin a sawi.

MSU leh ACCJSU hruaitu thubuai siamsakna dante chu - IPC Section 143 (unlawful assembly), IPC Section 145 (joining unlawfull assembly armed with deadly weapon), IPC Section 147 (rioting), IPC 152 (assaulting or obstructing public ser­vant when suppressing riot), IPC Section 353 (assault or criminal force to deter public servant from discharge of his duty) leh, IPC Section 427 (mischief causing damage to the amount of fifty rupees)-te a ni.

MSU leh an thawhpui pawl ṭhenkhatte chuan January 18, 2016 khan PwD commissioner B Sairengpuii rawih nawn an duh loh vangin a pisa kai tur chu Chaltlanga a pisa kawtah an dang. MSU thawhpuite hi ACCJSU leh Mizoram Blind Society an ni.

MSU leh ACCJSU-te chuan PwD commissioner aṭanga B Sairengpuii bàn phutin January 21, 2016-ah Zarkawt aṭangin PwD Commissioner pisa bul thleng kawng an zawh leh a; tlai dar 4 velah zirlaite chu police nen an innawr a, police-in tear gas an hmang. An innawrnaah hian police panga an hliam a, zirlai zingah pawh hliam an awm nual.

January 22, 2016-ah pawh zirlaite chu Vanapa Hall kawtah an pungkhawm leh a; PwD commissioner atana B Sairengpuii ruat nawnna thupek chu Mizoram sorkarin chawhma dar 11 velah a sût avangin buaina awm loin zirlaite chu an ṭîn darh a ni.