KHAWTHLIR

Bial hming thlak remti
Champhai DC Vanlalngaihsaka hoa Champhai District Level Standing Committee hotute nimina ṭhukhawm chuan, an district chhunga East Tuipui constituency hming thlak dilna an ngaihtuah a, East Tuipui tih chu Tuipuiral tia thlak an remti. Champhai District Level Standing Committee hian Assembly constituency hming thlak hi Election Commission of India-ah pawmpuina an dilsak dawn a ni.

GST zirho
India ram pumah July 1, 2017 aṭangin Goods & Services Tax (GST) hman a nih dawn avangin Taxation department chuan nimin khan IPR directorate auditorium-ah an hna thawh zel dan tur sawihona workshop leh GST dan siam tharte zirhona an buatsaih.

Thisen pe
Lengpui Bial KṬP-te chuan, nimin khan Lengpui Kohhran hall-ah blood donation camp an huaihawt a, mipa 56 leh hmeichhia pakhatte'n Synod Hospital tan thisen unit 57 an pe.

Larsap kâwm
Mizorama lo zin mek, ICFAI University (Mizoram) chancellor Prof. JP Ramappa chuan, nimin khan ICFAI University visitor Lt. Gen. Nirbhay Sharma, Mizoram Governor chu Raj Bhavan-ah a hmu a; ICFAI University hma-lakna te, campus building sak belh tum mekte leh an hmachhawpte an sawi dun.

Ruihhloa fimhlim dan tur inzirtir
Mizo Students Union regional headquarters, Lunglei chuan, nimin khan Saikuti Hall-ah ruihhlo tel loa zirlaite'n an zirlaia hlawhtlinna an chan theihna tura inzirtirna, 'Education without drugs and alcohol' an buatsaih. He hunah hian Lung-leia higher secondary school zirlaite an tel a; resource person Dr PC Lalvohbiki'n zirlaite ruihhlo laka an fihlim theih nana an tih tur leh tih loh turte a sawi a ni.