Serchhip dist-a ODF-a inpuang khuate Monitoring team-te'n an endik ṭan

Serchhip district-a khua zawng zawngte chu páwn lama inthiar awm lohna, open defecation free (ODF)-ah an inpuang tawh a; ODF-a puan theih an nih leh nih loh enfiah hna chu nimin aṭang khan district level monitoring team-in an endik ṭan.

Monitoring team kal chhuak turte hi nimin chawhma khan Serchhip DC Sangchhin Chinzah, Serchhip District Swachh Bharat (Gramin) chairman ni bawkin DC pisa aṭangin a vai liam. Sangchhin Chinzah chuan, Swachh Bharat Mission kalpui mekah ODF chu ngaih pawimawh ber pawl a nih thu a sawi.

Serchhip DC chuan, an district chhunga thingtlang khua zawng zawngte ODF-a an inpuang vek thei chu lawmawm a tih thu a sawi a; district level-a endik a nih hnuah state level-a endik leh an nih dawn avangin a endik tura chhuak turte chu uluk taka enfiah turin a chah a ni.

District chhunga khuate ODF-a an inpuan hnuah RD Block-a thuneitute'n an enfiah tawh a, BDO-te'n an pawmpui hnuah district thuneitute'n an enfiah ve leh dawn a ni. Serchhip district level-a endiktu tur monitoring team hi hmun hnih-ah an inṭhen a, Serchhip RD Block leh East Lungdar RD Block-a khaw panga ve ve an endik ang.

District level-a endik a nih hnua district pum chu ODF-a an inpuan hnuah, state level-a endik ve leh a ni ang. Serchhip district-ah hian SBM(G) hnuaiah khaw 35 an awm a ni.