Special Drive atan inbuatsaih zel

Election Commission of India (ECI) ruahman angin, July 1, 2017 aṭanga kum 18-21 inkar electoral roll-a la chuang lote thunluh runpui, Special Drive neih tur atan hmun hrang hrangah inbuatsaihna kalpui zel a ni.

Aizawlah chuan Special Drive atana inbuatsaih nan nimin khan Vanapa Hall-ah booth level officer (BLO)-te tan training buatsaih a ni. BLO-te hian July thla chhungin an biala kum tling tawh, vote la nei lote zawngin an fang kual dawn a; electoral roll-a luh dilna form chu BLO hnenah thehluh theih nghal a ni ang.

Lungleiah chuan DC mawhphuehna la mektu K Lalrohlua hoin a pisaah drive atana inbuatsaih dan ngaihtuahin political party leh sorkar official-te an ṭhukhawm. K Lal-rohlua chuan, vote nei rual, India khua leh tui dik takte electoral roll-ah an hming a awm theih nan ECI-in theihtawpa hma a lak thu a sawi a; ṭha taka hnathawh a nih theihna atan thawhpui turin political party-te a sáwm a ni.

Champhaiah chuan DC Vanlalngaihsaka'n DC conference hall-ah special drive neih tura thil pawimawhte political party leh tlawmngai pawl hruaitute a hrilhfiah.

Vanlalngaihsaka chuan, khua leh tui dik tak vote nei theite electoral roll-a awm tura hmalak a pawimawh rualin, voter-te'n vote an thlak ngei a pawimawh thu a sawi a, "Political party-te'n an hriatpui leh an pawm tlan thlap electoral roll felfai nei turin tumah bâng loa ṭanrual a ngai a ni," a ti.