In sakna dilna 5,257 pawm

Aizawl District Pradhan Mantri Awas Yojana-Housing for All (PMAY-HFA) (Urban) Screening Committee chu nimin khan NLUP conference hall-ah an ṭhukhawm. PMAY-HFA (Urban) kalpui mekah Beneficiary Led-Construction (BLC) component hnuaia in sak dilna thehluttu chhungkaw 5,257 dilna chu state level Sanctioning and Monitoring Committee (SLSMC) ennawn turin an pawm.

DPR hmasa ber (1st. DPR)-ah Aizawl khawpui chhunga chhungkaw 864 chu Ministry of Housing & Urban Poverty Alleviation chuan a pawm tawh a ni.

Aizawl district-a khawpui pali - Saitual, Darlawn, Sairang leh Lengpui-ahte 1st DPR tur kalpui a ni bawk a; enfiah tawh niin, heng khawpui pali aṭang hian diltu chhungkua 1,950-te chu meeting chuan SLSMC-a en leh turin an pawm bawk.

Application result hi SLSMC-in a chhawpchhuah hmain chawlhkar khat vel zawhfiah leh sawisel theihna hun siam a ni a, chu'ngte chu endika siam-ṭha leh turin Screening Committee chuan UDPA department chu state level nodal agency (SLNA) atan a pawm.

PMAY-HFA 2022 Mission hi June 2015-a puan chhuah a nih aṭangin Mizoramah hmalak a ni. Scheme hi awmze nei leh ṭha zawka a kal theih beiseiin Mizoram sorkar chuan June 7, 2016 khan District Screening Commitee a din a, PMAY-HFA Beneficiary Led-Construction (BLC) component hnuaia dilna thehluttute chu an in ngeia kal chilh niin, local council, YMA, MHIP leh MUP-te nena endik a ni.

Meeting-ah hian Aizawl khawpuia MLA pathum - Vanlalzawma, Lalruat-kima, R Vanlalvena te bakah, AMY mayor PC Lalhmingthanga leh bank hotute an tel.