Neihloh M/S zirlaite sikul an kai lo

Thenzawl khaw bula Neihloh khuaa middle school-ah zirtirtu an awm mumal loh avangin zirlaite nu leh pate chuan June 19, Thawhṭanni aṭang khan tiamchin awm loin an fate sikul an kaitir lo.

Thenzawla Vantawng chanchinbu editor Lian-tluanga Renthlei-in Vang-laini palai a hrilh danin, Neihloh M/S-a kal zirlai nu leh pate chu June 17, Pa-thianni zan khan an inhmu khawm a; an khaw M/S-a zirtirtu sorkarin a pek belh theih nan an fate chu sikul kaitir loh an rêl a ni.

Neihloh khuaa zirlai nu leh pate sawi danin, Neihloh M/S-ah hian tun hma chuan zirtirtu panga an awm ṭhin a, kum 3/4 kal ta vel aṭang khan zirtirtu tam zawk chu sawn chhuah niin, tunah hian zirtirtu pahnih an awm. Zirtirtu pakhat chu a ngheta thawk a ni a, pakhat zawk chu SSA hnuaia mi a ni.

Zirlai nu leh pate chuan, Neihloh M/S-a zirtirtute chu kuminah an la kal mumal lo a, zirtitu pakhat zawk a kal chhunah pawh lehkha zirtir mumal loin, zirlaite chu hna a thawhtir ṭhin niin an sawi.

Neihloh V/C president Hmingthanmawia chuan, an khaw M/S-a zirtirtu harsatna chungchang chu sorkar hotute hnenah an thlen tawh thu leh, June 19 khan Thenzawl SDEO hnenah ziaka a thlen leh thu a sawi a ni.