CM-in infiamna hmanga Mizoram hming Chher zel turin association-te a sáwm

Mizoram State Olympic Association (MSOA) chuan June 19, Thawhṭanni khan Synod Conference Hall-ah an ṭhukhawm a, meeting kaihruaitu, MSOA president Lal Thanhawla, chief minister chuan, infiamna pawl hrang hrang hruaitute chu Mizoramin infiamna khawvela hming a chher zel theihna atan theihtawp chhuah turin a sáwm.

Lal Thanhawla chuan, Mizoramin infiamna chi hrang hrangah India ramah hriat a hlawh mek tih sawiin, “Khawvel leh ram pum huapa Mizo infiammite’n hming an chher mek hi a lawmawm hle. Hei hi state level sport association hrang hrangte inpekna leh infiammi thawhrimna vang a ni,” a ti.

Kawng hrang hrangah infiamna lama hmasawnna awm mah se, hmasawnna tur tam tak a la awm thu sawiin CM Hawla chuan, “Mizoramin infiamna chi hrang hrangah theihna a nei a ni tih ram pumin a hre mek a, football-ah phei chuan football factory tih hial khawpin Mizoram hming a thang mek a ni,” a ti a; sport association hrang hrangte chu tha thlah loa ṭang turin a chah.

Meeting-ah hian Commonwealth Games 2018, Asian Games leh Youth Olympic Games-ahte tel thei tur an awm leh awm loh association zawng zawng zawh ni se, an lo awm a nih chuan nasa zawkin infiammite ṭanpui ni se, an ti.