Healthy Mizoram Campaign kalpui ṭan

International Yoga Day denchhenin nimin zing khan Assam Rifles-in Lammualah 'Healthy Mizoram Campaign' an buatsaih a, Governor Lt.Gen. Nirbhay Sharma leh Union minister of state for Railways Rajen Gohain ten an hmanpui.

Larsap chuan, cam­paign chuan faina leh hriselna kawngah mipui náwlpui tan hlâwkna thlen ngei se a duh thu sawiin, "Ruihhlo, zûk leh hmuam vanga taksa hrisel lohna hrang hrangte avangin Mizoramin nun dan phung hrisel zawk uar thar a, taksa insawizawina nena ni tin hun hman a pawimawh," a ti.

Yoga chu Mizoramah mi tam takin an la hlau­thawng nia a hriat thu a sawiin Governor chuan, "Yoga hi sakhaw pakhat rinna nena sawi zawm theih a ni lo," a ti a; sa­khuanna sawi tur a awm hma kum 5,000 liam tawh aṭangin Yoga chu hman a ni tawh niin a sawi.

Railways minister Rajen Gohain pawhin thu sawiin, "Healthy campaign-ah Yoga telh ve a ni hi thil tih âwm tak a ni. Khawvel ram 192-ah mipui chhiar sen lohte'n an hlawkpui mek a. Hriselna atan Yoga la hmang ve lote pawhin a ṭhatna hriaa an hman ve ngei ka duhsak a, taksa bakah thluak sâwizawi nan hman theih a ni," a ti.

23 Sector Assam Riffles DIG Brig. MS Mokha sawi danin, Healthy Mizoram Cam­paign hian kum khat chhung a awh phawt dawn a, Mizoram hmun hrang hrangah huaihawt a ni ang. Campaingn hnuaiah Yoga, health, healing, naturopathy, neu­rotherapy leh drug reha­bilitation-ahte hmalakna an tum a ni.

Campaign hawn in­khawmah hian a huhoa Yoga hmanga insawi­zawina hun hman a ni a, sipai, zirlai, NCC leh Yoga insawizawina hun hmang ṭhinte an tel a ni.